भीक मागण्यासाठी रेल्वे प्लॅटफॉर्मवरुन केले 3 वर्षीय मुलीचे अपहरण; भिकाऱ्याला 10 वर्ष तुरुंगवासाची शिक्षा, 35,000 दंड

पणजी: भीक मागण्यासाठी मडगाव रेल्वे स्थानकावरुन तीन वर्षीय मुलीचे अपहरण केल्याप्रकरणी भिकारी दोषी सापडला आहे. गोव्यातील बाल न्यायालयाने त्याला दहा वर्षे तुरुंगवास आणि ३५,००० रुपयांचा दंड ठोठावला आहे. न्यायालयाने बुधवारी आरोपी इंदू रिझवान याला शिक्षा ठोठवली.

आई – वडिलांसोबत मडगाव रेल्वे स्थानकावर झोपलेल्या तीन वर्षीय मुलीचे रिझवान याने अपहरण केले. नोव्हेंबर २०१७ रोजी रेल्वे स्थानकाच्या प्लॅटफॉर्म नंबर एकवर ही घटना घडली. मुलीच्या मोठ्या बहिणीला ही गोष्ट लक्षात आल्यानंतर तिने पालकांनी माहिती दिली.

पालकांनी कोकण रेल्वे पोलिसांकडे याबाबत तक्रार दाखल केली. स्थानकावरील सीसीटीव्ही फुटेज तपासले असता एक व्यक्ती मुलीचे अपहरण करुन फरार झाल्याचे दिसून आले.

मूळ हुबळी, कर्नाटक येथील असणारे हे कुटुंब वारंवार गोव्यात कामाच्या निमित्ताने येत असते. भीकारी रिझवानचा मंगळुरु पोलिसांनी पाठलाग केल्यानंतर त्याने गोव्यात जम बसवला होता. गोव्यातून तीन वर्षीय मुलीचे अपहरण केल्यानंतर त्याने मुंबई, सुरत आणि भोपाळ येथे भीक मागण्यासाठी तिला फिरवले.

रेल्वे आणि गोवा पोलिसांची टीम बांद्रा मुंबईत तपास घेण्यासाठी दाखल झाली. तसेच, आरोपी रिझवानचे फोटो देशभरातील पोलिस स्थानकांत पाठविण्यात आले. दरम्यान, एक वर्षानंतर रिझवानचा शोध लागला आणि त्याला अटक करण्यात आली.

भोपाळ येथे रिझवान अपहरण केलेल्या मुलीसह भीक मागत असल्याचे आढळून आले होते. यानंतर रिझवानला अटक करुन मुलीची सुटका करीत पालकांच्या स्वाधीन करण्यात आले होते.