वास्कोतील बँकांचा संप; खातेधारकांची गैरसोय

वास्को: स्टेट बँक ऑफ इंडिया सह सार्वजनिक क्षेत्रातील बँकांनी (Bank) आज व उद्या शुक्रवार असे दोन दिवसांचा संप पुकारला असून याला वास्कोतील बँकांचा शंभर टक्के प्रतिसाद लाभला. युनायटेड फोरम ऑफ बँक युनियनने सार्वजनिक क्षेत्रातील बँकाचे खासगीकरण करण्याच्या केंद्राच्या निर्णयाच्या निषेधार्थ संपाची हाक दिली आहे.

सार्वजनिक क्षेत्रातील बँकांच्या खाजगीकरणामुळे सामान्य लोकांचा आणि देशातील मागासलेल्या प्रदेशाचं हित धोक्यात येईल असा दावा युएफबीयुने केला आहे.

दरम्यान, केंद्र सरकारने (Central Government) सरकारी बँकांच्या खासगीकरणाचा घाट घातल्याने याचा निषेध करण्यासाठी दोन दिवस देशातील सरकारी कर्मचारी संपावर गेले आहेत. त्यानुसार आज पहिल्या दिवशी वास्कोतील सर्व राष्ट्रीयीकृत बँका पूर्णवेळ बंद ठेवण्यात आल्या होत्या. काही खातेधारकांना या संपाची माहिती नसल्याने बँकेत आले असता त्यांना बँका बंद असलेल्या आढळल्याने त्यांना माघारी परतावे लागले. येथील बँक ऑफ इंडिया, स्टेट बँक ऑफ इंडिया, पंजाब नॅशनल बँक, सिटीजन बँक, कॉर्पोरेशन बँक, सारस्वत बँक, सिंडिकेट बँक, युको बँक, देना बँक आदी राष्ट्रीयकृत बँका बंद ठेवून या संपाला वास्कोतील (Vasco) शाखानीही पाठिंबा दर्शविला.