'मित्राचा तो कॉल खोटा असावा अशी मी प्रार्थना करत होतो', बाणस्तारी अपघातात आई - बाबांना गमावलेल्या साहिलने सांगितला थरारक अनुभव

Banastarim Bridge accident Experience of youth working with goa police who lost both parents: गेल्या रविवारी गोव्यात बाणस्तारी येथे झालेल्या भीषण अपघातात तीन जणांचा बळी गेला. तर, तीनजण गंभीर जखमी झाले. याशिवाय आणखी चारजण किरकोळ जखमी झाले. या अपघातात दिवडी येथील फडते दाम्पत्याचा मृत्यू झाला आहे. त्यांचा मुलगा साहील हा गोवा पोलिसांच्या गुन्हे शाखेत फोटोग्राफर म्हणून सेवा बजावत आहे.

आपल्या आई वडीलांचा अपघात झाल्याची माहिती मिळाल्यानंतर साहिलवर बेतलेल्या प्रसंगाचे अनुभव कथन त्याने केले आहे. अपघाताची माहिती देणारा फोन मित्राने केल्यानंतर तो फोन खोटा असावा अशी प्रार्थना मी करत होतो असे साहिलने म्हटले आहे.

अपघाताच्यापूर्वी साहील मित्रांसोबत दिवडी येथे मित्रांसोबत फुटबॉल खेळत होता. दरम्यान, एका खूनाच्या तपास प्रकरणी त्याला वास्को येथे बोलावण्यात आले. आईला लवकर मागे येतो असे सांगून साहील वास्कोला जाण्यासाठी बाहेर पडला.

दिवडी-रायबंदर येथे त्याने बाबा दुचाकीवरून घरी परतत असताना दिसले. दरम्यान, रात्री आठ वाजता त्याला अपघाताची माहिती देणारा मित्राचा फोन आला. बाबा दुचाकीवरून एकटेच घरी जाताने त्याने पाहिले असल्याने मित्राचा कदाचित गैरसमज झाला असावा असा समज त्याने केला.

"मला फोन येताच मी गोवा वैद्यकीय महाविद्यालयाच्या रूग्णालयात धाव घेतली. प्रवासात मी मित्राचा तो कॉल खोटा असावा अशी प्रार्थना करत होतो. रूग्णालयात पोहोचताच डॉक्टरांनी माझे बाब गेल्याचे सांगितले. माझ्या आईची माहिती अद्याप मिळत नव्हती, तिच्या फोनवर कॉल केला पण तो बंद येत होता."

"रूग्णालयातील सर्व वार्डमध्ये चौकशी केली पण ती मिळाली नाही. अपघाताच्या ठिकाणी ती असेल म्हणून मी घटनास्थळी असलेल्या पोलिसांना फोन केला. एक तासानंतर बाणस्तारी पुलाच्या शेजारी तिचा मृतदेह आढळून आला." असे साहिलने सांगितले.

साहिलची धाकटी बहीण पोस्ट ग्रॅज्युएशन करत आहे. याशिवाय त्यांच्या कुटुंबात त्यांचे आजी-आजोबा आहेत.

वडिलांनी आयुष्यभराची कमाई त्यांचे जुने घर दुरूस्त करण्यासाठी गुंतवली होती आणि पुढील महिन्यात गणेश चतुर्थीपूर्वी नवीन घरात प्रवेश करण्याचा त्यांचा विचार होता. असे साहिलने सांगितले. या प्रकरणाचा योग्य तपास करून अपघाताला दोषी असणाऱ्यांना योग्य शिक्षा मिळावी एवढीच अपेक्षा आहे. असेही साहिलने सांगितले.