खवळलेल्या दर्याचा मच्छीमारांना फटका, मासेमारी करण्याचे टाळले

फातोर्डा: मासेमारी बंदी आजपासून उठविली असली, तरी दर्या खवळल्याने सासष्टीतील मच्छीमारांनी समुद्रात उतरण्याचे टाळले आहे.

मागील एक महिन्यापासून त्यांच्या बोटी किनाऱ्यावर होत्या. या काळात मासेमारीसाठी सरकारने बंदी घातली होती. मागील १० दिवसांपासून या मच्छीमारांनी दर्यात मासेमारीसाठी जाण्‍याची तयारीही केली होती.

मात्र, हवामान खराब तसेच दर्या खवळलेला असल्‍याने मच्छीमारांनी सुरक्षेच्या कारणास्तव मासेमारी करण्याचे टाळले आहे.

सध्या दर्याही खवळलेला आहे. सध्याची स्थिती समुद्रात उतरण्यासाठी योग्य नाही. त्यातच वेगाने वारे वाहात आहेत. दर्या शांत झाल्यानंतर मासेमारीसाठी समुद्रात उतरणार आहोत, असे बाणावली येथील मच्छीमार पेले फर्नांडिस यांनी सांगितले.

कोलवा येथील मिनिनो यांनी सांगितले, बोटीवर काम करणारे कामगार गावी गेले आहेत. ते सध्या पावसामुळे तेथेच अडकून पडले आहेत. त्यामुळे बोट समुद्रात उतरविण्याचे टाळले आहे. कामगार आल्‍यानंतर बोट समुद्रात उतरवणार आहोत, असे अन्य बोटमालकांनी सांगितले.