Curchorem Roads: कंत्राटदार बदलले तरी खड्डे तसेच! चतुर्थीपूर्वी खड्डे बुजवण्याच्या घोषणेचे काय झाले?

कुडचडे:  रस्त्यांवरील खड्डे चतुर्थीपूर्वी बुजविण्याची मागणी कुडचडेतील लोक करीत आहेत, तर मुख्यमंत्री डॉ. प्रमोद सावंत यांनीही चतुर्थीपूर्वी सर्व खड्डे बुजविण्यात येतील, असे सांगितले असतानाच बाप्पा घरी आले तरी खड्डे जशास तसे असल्यामुळे नागरिकांनी तीव्र नाराजी व्यक्त केली आहे.

काही भाविकांनी चतुर्थीपूर्वी एक दिवस आधी (शुक्रवारी) गणेशमूर्ती घरी आणल्या. काहीजण उद्या (शनिवारी) आणणार आहेत. अशा खड्डेमय रस्त्यावरून दुचाकी सोडाच, चारचाकीमधूनही गणेशमूर्ती घरी कशी आणावी, याची चिंता भाविकांना लागून राहिली आहे. कारण कुडचडेतील रस्त्यांची अक्षरश: चाळण झाली आहे. येथील रस्त्यांची चतुर्थीपूर्वी डागडुजी करणे आवश्यक होते.

पाऊस अधिक पडत असल्यामुळे रस्ता दुरुस्ती करणे शक्य झाले नसले, तरी पावसाने उघडीप दिल्यावर खड्डे बुजविणे शक्य होते. मात्र, डांबरीकरण सोडाच, खड्डेही न बुजविल्यामुळे लोकांना शारीरिक त्रास सहन करावे लागत असून वाहनेही खिळखिळी होत आहेत.

कंत्राटदार बदलतात, स्थिती तीच

पुष्कल सावंत म्हणाले की, विकास हवा म्हणून किती काळ जनतेने दुःख सहन करावे, हा प्रश्न आहे. कामे पूर्ण होत नाहीत. फक्त कंत्राटदार बदलत आहेत. परत परत त्याच ठिकाणी खड्डे पडतात. जनतेला त्रास देण्याचे कंत्राट सार्वजनिक बांधकाम खात्याने घेतले आहे की काय? आता पावसाचे निमित्त पुढे करून चालणार नाही. सरकारने व्यवस्थित नियोजन करून खड्डे बुजवावेत.