Babush Monserrate Santa Cruz Office: "परवानगी मागितली असती तर नकारच दिला असता!", बाबूश मोन्सेरात यांच्या कार्यालयावरुन भाजप प्रदेशाध्यक्षांनी स्पष्टच सांगितलं

पणजी: महसूलमंत्री बाबूश मोन्सेरात यांनी सांताक्रुझ मतदारसंघात स्वतंत्र कार्यालय सुरू करण्याच्या निर्णयाची भाजपला कोणतीही पूर्वकल्पना नव्हती, असे भाजपचे प्रदेशाध्यक्ष दामोदर (दामू) नाईक यांनी बुधवारी स्पष्ट केले.

या निर्णयामुळे सांताक्रुझचे भाजप आमदार रुडॉल्फ फर्नांडिस यांनी नाराजी व्यक्त केल्याच्या पार्श्वभूमीवर पक्ष दोन्ही नेत्यांशी चर्चा करून तोडगा काढणार असल्याचेही त्यांनी सांगितले. सांताक्रुझमध्ये बाबूश मोन्सेरात कार्यालय सुरू करणार असल्याबाबत पत्रकारांनी विचारले असता नाईक म्हणाले की, हा निर्णय पक्षाच्या माहितीत नव्हता.

बाबूश यांनी यापूर्वी पक्षाची परवानगी मागितली असती, तर मतदारसंघात आधीच भाजपचा आमदार असल्याने स्वतंत्र कार्यालय सुरू करू नये, असा सल्ला त्यांना दिला असता. सांताक्रुझ मतदारसंघाचे प्रतिनिधित्व करणारे आमदार रुडॉल्फ फर्नांडिस यांनी या घडामोडीबाबत नाराजी व्यक्त केल्याचे समोर आले आहे.

त्यावर प्रतिक्रिया देताना नाईक यांनी पक्षात समन्वय राखणे महत्त्वाचे असून पक्षातील दोन्ही नेत्यांशी स्वतंत्रपणे चर्चा करून गैरसमज दूर करण्याचा प्रयत्न केला जाईल, असे स्पष्ट केले. सांताक्रुझमधील या घडामोडींमुळे भाजपमधील अंतर्गत समन्वयाचा प्रश्न चर्चेत आला असून, पक्षनेतृत्व या वादावर लवकरच पडदा टाकण्याचा प्रयत्न करणार असल्याचे नाईक यांच्या भूमिकेतून स्पष्ट झाले आहे.

गोवा फॉरवर्ड-काँग्रेसमधील संघर्ष बालिश

गोवा फॉरवर्ड आणि काँग्रेस यांच्यात आघाडीच्या मुद्यावरून सुरू असलेला संघर्ष हा बालिशपणाचा असल्याची टीका भाजपचे प्रदेशाध्यक्ष दामोदर नाईक यांनी केली. या दोन्ही पक्षांमधील वादाची भाजप दखलही घेत नसल्याचे स्पष्ट करत त्यांनी विरोधी पक्षांच्या नेत्यांनी किमान राजकीय पोक्तपणा दाखवून परिपक्व भूमिका घ्यावी, असा सल्ला दिला.