National Games 2023 Goa: धावता-धावता थेट सुवर्णपदकापर्यंत!

National Games 2023 Goa: बाबू गावकर लहानपणापासून धडपड्या आणि चपळ, सतत धावत राहणारा मुलगा. अंगणात पळण्यास सुरवात केल्यानंतर तो रस्त्यावरून धावू लागला, तेथून थेट मिनी-मॅरेथॉनचा मार्ग धरला आणि अखेरीस धावण्यातील कौशल्याच्या जोरावर ३७ व्या राष्ट्रीय क्रीडा स्पर्धेत यजमान गोव्यासाठी पहिला पदकविजेता बनला, तेही सुवर्णपदक. सोनेरी यशासह बाबू राज्याचा ‘सुपरस्टार’ ठरला!

पंतप्रधान नरेंद्र मोदी यांच्या हस्ते ३७ व्या राष्ट्रीय क्रीडा स्पर्धेचे उद्‍घाटन होण्यास काही तास बाकी असताना २२ वर्षीय बाबूने फोंड्यातील क्रीडा संकुलात इतिहास रचला.

मॉडर्न पेंटॅथलॉनमधील लेझर रन प्रकारात तो अव्वल ठरला. धावणे व शूटिंग (नेमबाजी) त्याने वेग आणि अचूकता यांचा सुरेख संगम साधला.

21 वेळा मिनी मॅरेथॉन विजेता

धावणे हा बाबूचा छंद. केपे सरकारी महाविद्यालयात त्याने गतवर्षी पदवीपर्यंतचे शिक्षण पूर्ण केले. शालेय-महाविद्यालयीन पातळीवर वेगवेगळ्या शर्यतीत तो अव्वल ठरला.

गोवा विद्यापीठाच्या आंतरमहाविद्यालयीन स्पर्धेत त्याने १५०० मीटर शर्यतीत सुवर्णपदक पटकावले. ‘वडिलांनी आर्थिकबाबतीत सर्व गरजा पूर्ण केल्या. त्या पाठिंब्यामुळेच मी राष्ट्रीय क्रीडा स्पर्धेत सुवर्णपदक जिंकू शकलो’, असे तो म्हणाला.

वाढदिनी ‘गोल्डन गिफ्ट’ : नेत्रावळी या ग्रामीण भागातील बाबू गावकर याचा आज २२ वा वाढदिवस. आयुष्यातील हा दिवस अविस्मरणीय ठरविताना त्याने राज्याला ‘गोल्डन गिफ्ट’ दिले. ‘वाढदिनी काही तरी भव्य दिव्य करण्याचा माझा निश्चय होता, तो साध्य झाल्याचा मला अभिमान आहे,’ असे तो म्हणाला.

लेझर रन म्हणजे काय?

1 मॉडर्न पेंटॅथलॉन खेळातील लेझर रन हा एक प्रकार

2 लेझर रनमध्ये स्पर्धक ६०० मीटर अंतराच्या ५ फेऱ्या धावतो.

3 प्रत्येक फेरीत थांबून १० मीटर अंतरावरून ४ वेळा ५ लक्ष्यावर लेझर पिस्तुलाद्वारे नेम साधतो