Jama Masjid Bicholim: आझाद जामा मशिदीच्या निधीत गैरव्यवहार! अध्यक्षांसह गावकऱ्यांचा आरोप; डिचोली पोलिसांकडे तक्रार

डिचोली: येथील आझाद जामा मशिदीचा कारभार बेकायदेशीरपणे चालला असून, मशिदीच्या निधीत मोठ्या प्रमाणात घोटाळा झाला असून, या घोटाळ्यामागे सचिव आणि खजिनदारांचा हात आहे, असा आरोप मशीद समितीचे अध्यक्ष नझीर बेग, युसूफ शेख, फिरोज बेग आणि इतर मुस्लिम बांधवांनी केला आहे.

नझीर बेग यांच्या नेतृत्वाखाली मुस्लिम बांधवांनी (गुरुवारी) तक्रार डिचोली पोलिसांत केली. या निवेदनावर ७० हून अधिक मुस्लिम गावकरी बांधवांनी सही केली आहे. दरम्यान,सहकार निबंधकांनी दिलेल्या आदेशानुसार मशिदीची निवडणूक घ्यावी.

निवडणूक घेण्यास टाळाटाळ केल्यास न्यायालयात धाव घेऊ, असे फिरोज बेग आणि इतरांनी स्पष्ट केले. प्रशासनाने सांगूनही जामा मशिदीची २०१९ नंतर निवडणूक झालेली नाही.

गेल्या साडेसहा वर्षांत सचिव व खजिनदाराने मशिदीच्या निधीत गैरव्यवहार केला असून, मी अध्यक्ष असूनही मला अंधारात ठेवले, असा आरोप नझीर बेग यांनी केला आहे.