Avedem Panchayat: ‘ऍडिंको’ विस्ताराच्या विरोधात स्थानिक आक्रमक; न्यायालयात जाण्याचा इशारा

केपे: अवेडे येथील ‘ऍडिंको ’ इंडस्ट्रीजच्या विस्ताराला ग्रामस्थांनी रविवारी (ता.४) झालेल्या ग्रामसभेत विरोध केला. या कंपनीचा विस्तार झाल्यास गावात प्रदूषण वाढेल, त्यामुळे पंचायतीने हे काम रोखावे, अशी मागणी यावेळी करण्यात आली. या कंपनीच्या विस्ताराविरोधात पंचायत उच्च न्यायालयात जाणार असल्याची ग्वाही सरपंच भूपेंद्र देसाई यांनी ग्रामस्थांना दिली.

अवेडे-पारोडा, अवेडे-कोठंबी पुलाची पाहणी करण्याची मागणीही ग्रामस्थांनी यावेळी केली. दरवर्षी पावसाळ्यात पुराचे पाणी या पुलावरून वाहते. त्यामुळे लोकांची गैरसोय होते. यंदा आलेल्या पुरात दोन्ही पूल पाण्याखाली गेले होते.

त्यामुळे त्यांची स्थिती नाजूक झाली आहे. यावर पंचायतीने लक्ष घालण्याची गरज ग्रामस्थांनी व्यक्त केली. दक्षिण गोव्यात सनबर्नचे आयोजन करू नये यासाठी तसेच रोमी कोकणी लिपीला राजभाषेचा दर्जा देण्यासाठी कायद्यात दुरुस्ती करावी, असा ठरावही यावेळी घेण्यात आला.

‘ऍडिंको ’ इंडस्ट्रीजच्या विस्ताराबाबत माजी सरपंच आलेलुया आल्फाेन्‍सो म्हणाले, जेव्हा मी सरपंच होतो, तेव्हापासून या प्रकल्पाला ग्रामस्थांनी विरोध केला आहे. असे असतानाही विद्यमान पंचायत मंडळाने विस्तारासाठी परवाना दिला आहे.

पंचायतीकडून योग्य प्रक्रियांचे पालन केले जात नाही. कायदेशीर गोष्टींकडे दुर्लक्ष करून पंचायतीने बांधकाम परवाना जारी केला आहे. त्याद्वारे हे बेकायदा बांधकाम केले जात आहे.

पंचायतीकडून लोकांची दिशाभूल

लोकांची दिशाभूल करून अवैध परवाना जारी करणे हे गावाच्या हिताविरोधात आहे. या प्रकरणात काही लोकांचा हात असू शकतो. पंचायतीने या प्रकरणात उच्च न्यायालयात जाण्याचे आश्वासन दिले आहे, असे आल्फाेन्‍सो यांनी सांगितले.

पंचायतीने योग्य लक्ष घालून लोकांना न्याय द्यावा. अवेडे-कोठंबी पदपुलाच्या सुरक्षिततेबद्दल तपासणी करण्‍याची मागणी विशाल देसाई यांनी केली. तेथे अपघात झाला तर स्‍थानिक लोक पंचायतीला जबाबदार धरतील, असेही देसाई म्‍हणाले.