Goa Assembly: मुरगावातील जेटी कोळशासाठीच! जिंदाल कंपनीकडून गोव्‍यात क्षमतेपेक्षा जास्‍त कोळशाची आयात; सरदेसाई बरसले

गोव्यात जिथे जाईल तिथे कोळसाच दिसतो. राज्याला ‘कोल हब’ बनवले जात आहे. जिंदाल कंपनीला 5.5 लाख टन कोळसा आणण्याची मुदत असताना त्या कंपनीने ९ लाख टन कोळसा आणला. यावरून मुरगावला क्रुझ टर्मिनससाठी जेटी बांधली जात नाही तर ती कोळसा वाहतुकीसाठी बांधली जात आहे हे स्‍पष्‍ट होते, असा आरोप विरोधी आमदार विजय सरदेसाई यांनी विधानसभेत केला.

गेल्या पाच वर्षांत गोवा प्रदूषण नियंत्रण मंडळाने एकाही कारखान्‍यावर कारवाई केलेली नाही. कुंकळ्‍ळी औद्योगिक वसाहतीत प्रदूषणाने उच्चांक गाठला आहे. तेथे मोठ्या प्रमाणात धोकादायक कचरा अजूनही आहे. तो पिसुर्लेला हटविला जात नाही. रात्रीच्या संगीत पार्ट्यांवरील कारवाईसाठी लाईव्ह ऑनलाईन नियंत्रणाची गरज आहे, असे सरदेसाई म्‍हणाले.

मच्छीमार खाते आणि प्रदूषण नियंत्रण मंडळाकडून वेळसाव किनाऱ्यावरील मासळी तपासली जात नाही. मासळी मरून पडल्‍यावर कारवाई केली जाते. प्रदूषण नियंत्रण मंडळाने कारवाई करून तेथील विक्रेत्यांना १२ लाख ३७ हजार रुपयांचे शुल्क आकारले. परंतु मासळी चांगली आहे किंवा नाही, हे सांगणारी यंत्रणा तेथे नाही, याकडे सरदेसाई यांनी सभागृहाचे लक्ष वेधले.