म्हापसा: हडफडे येथील बर्च बाय रोमिओ लेन क्लबमधील दुर्घटनाप्रकरणात हडफडे-नागवाचे अपात्र सरपंच रोशन रेडकर तसेच बडतर्फ पंचायत सचिव रघुवीर बागकर यांनी अटकपूर्व जामिनासाठी अर्ज केला होता. दोघांचे हे अर्ज न्यायालयाने फेटाळून आठवडा उलटला तरीही दोघेही अद्याप हणजूण पोलिसांच्या हाती लागलेले नाहीत.
६ डिसेंबर २०२५ रोजी बर्च क्लबमध्ये भीषण आग लागली होती. २५ निष्पाप लोकांना जीव गमवावा लागला होता. या प्रकरणात हडफडे-नागवाचे सरपंच रोशन रेडकर व प्रशासकीय सेवेतून बडतर्फ केलेले पंचायत सचिव रघुवीर बागकर यांचा न्यायालयाने अटकपूर्व जामीन अर्ज फेटाळल्यापासून ते दोघेही भूमिगत झाले आहेत.
हणजूण पोलिस गेल्या ३० डिसेंबरपासून रेडकर व बागकर यांचा शोध घेण्याचा प्रयत्न करताहेत. परंतु, ते पोलिसांना सापडलेले नाहीत. दोघांनी आपापले मोबाईल संच बंद ठेवल्याने, तांत्रिकदृष्ट्याही त्यांचा माग काढण्यात पोलिसांना अडचणी येताहेत, असे सूत्रांनी सांगितले.
गेल्या ३१ डिसेंबरला, पंचायत संचालनालयाने रोशन रेडकर यांचे सरपंचपद तसेच पंच सदस्यत्वही रद्द केले होते. तर पंचायत सचिव रघुवीर बागकर यांना सरकारी सेवेतून बडतर्फ केले होते. सध्या पोलिस दोघांच्याही घरी दिवसरात्र टेहळणी करत आहेत. परंतु दोघांचाही थांगपत्ता पोलिसांना लागलेला नाही.
बर्च क्लबमधील अग्नितांडवाला जबाबदार धरत हणजूण पोलिसांनी संशयितांपैकी सुरिंदर कुमार खोसला (ब्रिटीश नॅशनल) यांच्याविरुद्ध सर्वात आधी एलओसी म्हणजे लुक-आऊट सर्क्युलर जारी केले होते.
संशयित सुरिंदर कुमार खोसला बर्च क्लबस्थित असलेल्या मालमत्तेचा मालक आहे. तसेच पोलिसांनी त्यांच्याविरुद्ध इंटरपोलची ब्ल्यू कॉर्नर नोटीस बजावण्याची प्रक्रिया सुरू केली होती.
परंतु त्यानंतर याप्रकरणी तपास कुठवर आलाय किंवा तपासात नवीन अपडेट काय, याविषयी पोलिसांकडून आवश्यक माहिती अद्याप पुरविली गेलेली नाही.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.