Goa Resort Sealed: फरार सुरिंदर खोसलाचे रिसॉर्ट केले सील, बर्च अग्नितांडवप्रकरणी 'मेझॉन्स लेक व्ह्यू'वर कारवाईचा बडगा

म्हापसा: सांकवाडी-हडफडे येथील ‘बर्च बाय रोमियो लेन’ क्लबमधील अग्नितांडव प्रकरणातील फरार संशयित सुरिंदर कुमार खोसला याचे हडफडे येथील ‘मेझॉन्स लेक व्ह्यू रिसॉर्ट’ जिल्हा दंडाधिकाऱ्यांनी मंगळवारी (१३ जानेवारी) सायंकाळी सील केले.

सुरिंदर कुमार खोसला हा ब्रिटीश नागरिक असून, त्याच्या विरोधात हणजूण पोलिसांकडून लुक-आऊट सर्क्युलर जारी केले होते. खोसला हा बर्च क्लबस्थित मालमत्तेचा मालक आहे. पोलिसांनी त्याच्याविरुद्ध इंटरपोलची ब्ल्यू कॉर्नर नोटीस बजावली होती.

सध्या खोसला याच्याकडून काहीच प्रतिसाद मिळत नसल्याने हणजूण पोलिसांनी जिल्हाधिकाऱ्यांना अहवाल सादर केला होता. त्यानुसार खोसला याचे हडफडेमधील ‘मेझॉन्स लेक व्ह्यू’ हे रिसॉर्ट जिल्हा दंडाधिकाऱ्यांमार्फत सील करण्यात आले.

नोटिशीला प्रतिसाद नसल्याने कारवाई

सुरिंदर खोसलाचे रिसॉर्ट सील झाल्यावर तरी तो गोव्यात येतो की नाही, हे पाहावे लागेल. त्याच्या विरोधात लुकआऊट नोटीस तसेच इंटरपोलची ब्ल्यू कॉर्नर नोटीस जारी झाली होती.