Goa Revolution Day : पणजीतील संस्कृती भवनात 'पुराभिलेख सप्ताह प्रदर्शना'ला सुरुवात

पोर्तुगीज राजवटीत गोव्याच्या मुक्तीसाठी दिलेल्या लढ्याबद्दल स्वातंत्र्यसैनिकांच्या सन्मानार्थ पुराभिलेख विभाग दरवर्षी 18 जूनपासून पुराभिलेख सप्ताह प्रदर्शन आयोजित करते. यावर्षी आयोजित करण्यात आलेल्या 'अनसंग हिरोज ऑफ गोवा' या प्रदर्शनाचे उदघाटन पुराभिलेख संचालक दीपक बांदेकर यांच्या हस्ते करण्यात आले.

यावेळी मोडी मराठीचे जाणकार रत्नाकर देसाई यांनी संपादित केलेल्या ‘पोर्तुगीज हुकूमनामा’ या पुस्तकाचे प्रकाशन करण्यात आले.

स्वातंत्र्यसैनिकांना पोर्तुगीजविरोधी प्रचारासाठी शिक्षा झाली, तेव्हा त्यांच्याकडे राष्ट्रीय पत्रे, पुस्तके यासारखे जे काही सापडले, त्यांच्याकडून ती पत्रे, बॅनर जप्त केले आणि ते त्यांना शिक्षा करण्यासाठी पुरावे म्हणून वापरले.

हा अनमोल ठेवा आज गोमंतकीयांसमोर खुला करण्यात आला. या प्रदर्शनामध्ये गोवा मुक्ती चळवळीशी संबंधित विविध ऐतिहासिक नोंदी प्रदर्शित करण्यात आल्या. यामध्ये गोवा मुक्ती चळवळीत योगदान दिलेल्या स्वातंत्र्यसैनिकांची माहिती व कामगीरी प्रदर्शित करण्यात आली आहे.

‘पोर्तुगीज हुकूमनामा’ या पुस्तकात पोर्तुगीज सरकारच्या विशेषत: फोंडा महालाशी संबंधित ऐतिहासिक दस्तऐवजाविषयी उल्लेख आहे. हे प्रदर्शन गोमंतकीयांना पणजीत पाटो येथील संस्कृती भवनात 10 ते 5 या वेळेत पाहता येणार आहे.