Goa Crime: हरमलमधील चोरी प्रकरणाचा 2 दिवसांत छडा, कर्नाटकातील दोघांना अटक

Goa Crime गोवा पोलिसांची कामाप्रती निष्ठा आणि कार्यतत्परता वेळोवेळी दिसून येते. गोव्यातील अनेक गुन्हेगारीच्या प्रकरणांमध्ये पोलिसांनी अथक प्रयत्न करून गुन्हेगारांचा शोध घेत घटनेचा उलगडा केलाय. 29 मार्च रोजी हरमल येथील एका हॉटेलमध्ये झालेल्या चोरी प्रकरणाचा छडा लावण्यात देखील पेडणे पोलिसांना यश आलंय.

पेडणे पोलिसांनी 29 मार्च रोजी हरमल येथील एका हॉटेलमध्ये झालेल्या चोरी प्रकरणी कर्नाटकातील रहिवासी राजप्पा गणेश पीजी आणि सूर्या डीव्ही यांना अटक केली आहे. तसेच या दोघांकडून काही चोरीच्या वस्तू देखील जप्त केल्या आहेत.

दरम्यान या दोघांना ताब्यात घेतल्यावर चौकशी सुरु असताना महत्वाची माहिती पोलिसांना मिळाली आहे. या दोघांचाही अजूनही काही चोरीच्या घटनांमध्ये सहभाग असल्याचा संशय असून त्या संबंधी पुढील तपास सुरू आहे.