Arambol Water Shortage : नागरिकांचा संताप! हरमल पंचायत क्षेत्रात पाणी टंचाईचा कहर

Arambol Water Shortage : येथील पंचायत क्षेत्रात पाणी टंचाईने कहर केला आहे. अलीकडे टॅंकरचे पाणी चार-पाच दिवसांत येत असल्याने नागरिक व गृहिणीत संताप व्यक्त होत आहे. खालचावाडा भाग पर्यटनदृष्ट्या गजबजलेला असल्याने पाण्याची टंचाई नित्य जाणवत असते. लोकवस्तीशिवाय गेस्ट हाऊस, हॉटेल्स, रेस्टॉरंट व अन्य लहान-मोठे उद्योग असल्याने पाण्याची बारमाही गरज असते.

मात्र, उंचावरील वायंगणकर व फामापा पॉइंटनजीक पाणी चढत नसल्याने माज्जी यांच्या निवासस्थानाकडून फामापा पॉइंट लोकवस्तीत पाईपलाईन नेल्याने मधलावाडा भागात तसेच वायंगणकर यांच्या निवासस्थान परिसरात तसेच जुज्या पोलिस स्थानक भागात पाण्याचा तुटवडा नेहमीच असतो.

याचा परिणाम अनपेक्षित वेळेत पुरवठा होत असल्याने लोकांना रात्रीच्या वेळेत झोपमोड करून पाण्यासाठी तिष्ठत राहावे लागते. मात्र, एक-दोन घागर इतके पाणीसुद्धा मिळत नसल्याने देविदास नाईक यांनी नाराजी व्यक्त केली.

जलवाहिनीचे काम विचाराधीन

या भागांत नवीन जलवाहिनी घालण्याचे काम पूर्णपणे विचाराधीन आहे. कित्येक ठिकाणी फुटपाथ, घरे, कुंपणे तसेच आस्थापने आदी उभी राहिली असल्याने समस्या बिकट आहे. मांद्रे मतदारसंघाचे आमदार जीत आरोलकर यांनी या समस्येच्या निवारणासाठी खास प्रयत्न करणार असल्याचे सांगितले आहे.

खाते निष्क्रिय

या भागातील नागरिकांनी पेडणे कार्यालयावर मोर्चा, घागर मोर्चा व हरमल बंद केल्यावर त्या दोन दिवसांत पाणीपुरवठा वेळेत केला जातो. मात्र, पुन्हा येरे माझ्या मागल्या अशी स्थिती पाहता पुन्हा हरमल बंद करण्याचा प्रयत्न का करू नये, असे मत डिमेलो यांनी व्यक्त केले. खालचावाडा भागांत काही जणांकडून बुस्टर पपंच्या साहाय्याने पाणी चोरी होत असल्याचे उघड झाले होते.