Goa Fish Festival: 'ॲक्वा फिश फेस्टिव्हल’ला गर्दी! सत्रे, स्पर्धांनादेखील प्रचंड प्रतिसाद

Aqua Goa Mega Fish Festival 2025

पणजी: गोव्यातील मत्स्यसंस्कृती आणि सागरी परिसंस्थेचे महत्त्व अधोरेखित करणाऱ्या ‘ॲक्वा गोवा मेगा फिश फेस्टिव्हल’ला लोकांची मोठी गर्दी जमली, तर विविध सत्रे आणि स्पर्धांनादेखील प्रचंड प्रतिसाद लाभला.

गोवा सरकारच्या मत्स्य विभागाच्यावतीने कांपाल-पणजी येथे आयोजित ‘फिश फेस्टिव्हल’च्या आठव्या आवृत्तीला लोकांचा उत्स्फूर्त प्रतिसाद पाहायला मिळाला. येथे समृद्ध मत्स्यसंस्कृतीचे यशस्वीरीत्या प्रदर्शन करण्यात आले असून विविध प्रकारचे मासे दाखविण्यात आले आहेत.

कार्यक्रमाचा मुख्य भाग म्हणून आयोजित केलेल्या पॅनेल चर्चेत ‘मासे हाताळण्याचे सर्वोत्तम व्यवस्थापन तंत्र’ आणि ‘समुद्री खाद्य उत्पादने मूल्यवर्धनाचे प्रशिक्षण’ याविषयांवर विशेष चर्चा करण्यात आली. मत्स्य व्यवसायाशी संबंधित लोकांना याचा विशेष लाभ घेता आला.

शनिवारी मुलांसाठी आणि सामान्य जनतेसाठी विविध स्पर्धांचे आयोजन करण्यात आले होते. महत्त्वाचे म्हणजे स्पर्धकांनी आपल्या सर्जनशीलतेने, कल्पकतेने प्रेक्षकांची मने जिंकली.

विशेष आकर्षण

आजच्या कार्यक्रमात ‘पर्पल रेन’ या बँडच्या संगीत सादरीकरणासह गोव्यातील लोककला, बॉलिवूड नृत्य सादरीकरणे, अग्नी नृत्य सादरीकरण तसेच लाईव्ह संगीताचे विशेष कार्यक्रम सादर करण्यात आले. ‘एक्वा गोवा मेगा फिश फेस्टिव्हल २०२५’ हा केवळ एक महोत्सव नव्हे, तर गोव्याच्या सांस्कृतिक आणि पर्यावरणीय वारशाचे प्रतीक ठरला आहे.