Anjuna Assault: धारदार शस्त्राने डोक्यावर केला वार, 1 महिन्यानंतर पीडित व्हेंटिलेटरवरच; संशयिताचा जामीन फेटाळला

पणजी: हणजूण येथे १६ सप्टेबर रोजी झालेल्या मारहाण प्रकरणात अटक करण्यात आलेल्या साहिल बापू याचा जामीन अर्ज मेरशी येथील अतिरिक्त सत्र न्यायालयाने फेटाळला आहे. पीडिताचा जबाब अद्याप नोंदविता आलेला नाही.

आणि या टप्प्यावर संशयिताला जामीन देणे योग्य ठरणार नसल्याच्या सरकारी पक्षाचा युक्तीवादाला न्यायालयाने ग्राह्य धरत हा जामीन अर्ज फेटाळला. या हल्ल्यातील पीडित व्यक्ती ही ‘व्हेंटिलेटर’ वर असल्याचे न्यायालयाच्या निदर्शनास आणून दिले.

पोलिसांच्या माहितीनुसार, १६ सप्टेंबर रोजी सकाळी शापोरा येथील ‘अवतारा बार अँड रेस्टॉरंट’ जवळ साहिल बापू याने साईराम या व्यक्तीवर धारदार शस्त्राने डोक्यावर वार करून गंभीर दुखापत केली होती.

या प्रकरणावर दिलेल्या आदेशात अतिरिक्त सत्र न्यायाधीश आरती कुमारी नाईक यांनी गुन्ह्याचे गांभीर्य आणि पीडिताची गंभीर आरोग्यस्थिती ही जामीन नाकारण्याची मुख्य कारणे असल्याचे स्पष्ट केले. न्यायालयाने नमूद केले की, पीडित अद्याप शुद्धीवर आलेला नाही आणि गेल्या महिन्याभरापासून हैदराबाद येथील रुग्णालयात ‘व्हेंटिलेटर’वर आहे.

तपास अधिकाऱ्याने न्यायालयासमोर सांगितले की, आरोपी साहिल बापू याची ओळख आणि अटक सीसीटीव्ही फुटेजच्या आधारे करण्यात आली. तसेच पोलिसांनी आरोपीकडून हल्ल्यात वापरलेले शस्त्र आणि त्यावेळी परिधान केलेले कपडे जप्त केले आहेत.