Amthane Dam: 'नो एंट्री'चा फलक, तरीही वाहतूक सुरूच! ‘आमठाणे’ धरणावरून गाड्यांची ये-जा

डिचोली: आमठाणे धरणावरुन सध्या वाहतुकीस बंदी असली, तरी जबरदस्तीने वाहतूक करण्याचे प्रकार घडत आहेत. वाहतुकीवरुन गोंधळ उडत असतानाच, बऱ्याचदा वादावादीही होत आहे, अशी माहिती मिळाली आहे.

आमठाणे धरणावर नव्याने ‘गेट’ बसवण्यात येत असून, तिचे काम सध्या युद्धपातळीवर सुरू आहे. ‘गेट’च्या कामामुळे तूर्त ‘आमठाण’वरुन वाहतुकीस बंदी घालण्यात आली आहे. आमठाणे धरणावरील रस्त्यावरुन केवळ दुचाकीसह कार न्यायला मिळतात. मात्र सध्या या वाहनांनाही बंदी घालण्यात आली आहे.

वाहतूक बंदीविषयी आगाऊ कल्पना देणारे सूचना फलक धरणाच्या दोन्ही बाजूने लावण्यात आलेले आहेत. तरीदेखील त्याकडे दुर्लक्ष करून धरणावरुन वाहतुकीचे प्रकार चालूच असल्याचे दिसून येत आहे. काहीजण तर जबरदस्तीने धरणावरील रस्त्यावरुन वाहतूक करतात. बऱ्याचदा वादविवादही होतात.

दोन्ही बाजूने वाहने अडकल्याने कोंडी

७ दिवसांपूर्वी म्हणजेच गेल्या सोमवारी (ता. १४) धरणावरील रस्त्यावरुन एकाचवेळी दोन्हीबाजूने मोटारगाड्या आल्याने त्या जवळपास अर्धा तास धरणावर अडकून पडल्या होत्या. गाडी मागे कोणी घ्यायची, या मुद्यावरून वादही झाला, अशी माहिती मिळाली आहे. दरम्यान, धरणावरील ‘गेट’चे काम युद्धपातळीवर सुरू असून, चालू महिन्याच्या अखेरपर्यंत हे काम पूर्ण होणार आहे.