Amthane Dam: भर पावसातही ‘आमठाणे’ कोरडे! धरणात 5 टक्केच पाणी; पर्यटनावरही परिणाम

डिचोली: दरवर्षी साधारण जुलै महिन्यात ‘फुल्ल’ होणारे आमठाणे धरण यंदा मात्र भर पावसात कोरडे पडले आहे. सध्या या धरणात ५ टक्क्यांहून कमी जलसाठा असल्याचे दिसून येत आहे. स्वयंचलित गेट बसविण्याचे काम धरणावर सुरू असल्याने ही परिस्थिती उद्भवली आहे.

नैसर्गिक आपत्ती किंवा अन्य कोणत्याही कारणामुळे धरणातील जलसाठा कमी झालेला नाही. तर धरणावर स्वयंचलित गेट बसविण्यात येत असून, या कामासाठी धरणातील जलसाठा खाली करावा लागला आहे.

सध्या पंपिंगद्वारे धरणात भरणारे पाणी बाहेर सोडण्यात येत आहे, अशी माहिती मिळाली आहे. त्यामुळे सध्या या धरणाचे सभोवतालचे पात्र पूर्णपणे कोरडे ठेवण्यात आले असून, सध्यातरी हे धरण की एखादे तळे, असा प्रश्न अनेकांना पडत आहे.

नैसर्गिक कारणामुळे एखादेवेळी ‘पाणीबाणी’ ओढवलीच, तर साळ बंधाऱ्यातून धरणात पाणी सोडण्याची व्यवस्थाही जलसंपदा खात्याने केली आहे. दुसऱ्याबाजूने यंदा मात्र या धरणावर वर्षा पर्यटन करता येणार नाही. साधारण चालू महिन्यापर्यंत गेट बसवण्याचे काम चालणार आहे, अशी माहिती मिळाली आहे.

वर्षा पर्यटनावर परिणाम

गेल्या काही वर्षांपासून आमठाणे धरण वर्षा पर्यटनासाठी प्रकाशझोतात आले आहे. खासकरून पावसाळ्यात पर्यटनाची मजा लुटण्यासाठी स्थानिकांसह देशी-विदेशी पर्यटक या धरणावर येतात.

सुट्टीच्या दिवसांत तर गर्दी दिसून येते. जलसाठा कमी करण्यात आल्यामुळे यंदा पावसाळ्यात या धरणावर वर्षा पर्यटन करायला मिळणार नाही.

सध्याची वस्तुस्थिती माहित नसल्यामुळे सध्या धरणावर काही पर्यटक येत असून, त्यांना नाराज होऊन परतावे लागत आहे.

धरणावर स्वयंचलित गेट बसविण्याचे काम सुरू

१ ‘आमठाणे’ बांधल्यापासून धरणाच्या गेटच्या देखभालीकडे दुर्लक्ष झाले होते. गेल्या जानेवारीत कुडासे परिसरात ‘तिळारी’चा कालवा फुटल्यानंतर ‘तिळारी’तून गोव्याला पाणीपुरवठा बंद झाला होता. त्यामुळे उत्तर गोव्यात ‘पाणीबाणी’ निर्माण झाली होती.

२ आपत्कालीनवेळी आमठाणेतील पाणी अस्नोडा जलशुद्धीकरण प्रकल्पात सोडण्याची वेळ आली, तेव्हा धरणाची मुख्य ‘गेट’ उघडत नव्हती. ४ दिवस परिश्रम केल्यानंतर नौदलाच्या मदतीने ‘गेट’ उघडली. मात्र तोपर्यंत बार्देश तालुक्यातील जनतेचा ‘घसा’ कोरडा पडला होता.

३ या प्रकारानंतर जलस्रोत खात्याचा निष्काळजीपणा चव्हाट्यावर आला होता. आपत्कालीनवेळी पुन्हा असा प्रसंग निर्माण होऊ नये. यासाठी आता धरणावर स्वयंचलित मुख्य गेट बसविण्यात येत आहे. सध्या हे काम हाती घेण्यात आले आहे.