Sanquelim Accident: आमोणा, साखळी येथील भीषण अपघातात दोन्ही चालक जखमी; दोन्ही कारचा चकणाचूर

साखळी: आमोणा, साखळी येथील पुलाजवळ दोन कारमध्ये झालेल्या भीषण अपघातात दोन्ही वाहनांचे चालक जखमी झाले. त्यांना बांबोळी येथील गोमेकॉ इस्पितळात दाखल करण्यात आले आहे. तर दोन्ही कारचे मोठ्या प्रमाणात नुकसान झाले आहे.

दुपारी दीडच्या सुमारास ही अपघाताची घटना घडली. न्हावेली येथील संजय रामचंद्र गावस हा जीए ०४ एच १०८१ हे एका कारने न्हावेलीच्या दिशेने येत होते. तर अडोल्फ लेरी गोम्स हा जीए ०४ टी ७५४० या टाटा झेस्ट कारने आमोणेहून माशेलच्या दिशेने जात असताना दोन्ही कारमध्ये समोरासमोर जोरदार धडक झाली.

या धडकेत दोन्ही कार रस्त्याच्या बाहेर फेकल्या गेल्या व काठावर स्थिरावल्या. किया कार तर रस्त्याच्या बाजूला एका झाडाला लागून अडकली. अन्यथा बाजूच्या शेतात पडली असती. लोकांनी कारमध्ये अडकलेल्या चालकांना बाहेर येण्यासाठी मदत केली. १०८ रूग्णवाहिकेतून दोन्ही चालकांना साखळीतील सामाजिक आरोग्य केंद्रात नेण्यात आले. तेथून दोन्ही चालकांना गोमेकॉत नेण्यात आले. साखळी पोलीस आऊट पोस्टचे हवालदार प्रवीण शेट्ये यांनी पंचनामा केला.