Goa Tourism: ‘आग्वाद इंटरॅक्टिव्ह’ पर्यटकांसाठी खुले

Goa Tourism: आग्वाद इंटरॅक्टिव्ह म्युझियम या संग्रहालयाचे आज दसऱ्याच्या मुहूर्तावर पर्यटनमंत्री रोहन खंवटे यांच्या हस्ते उद्‍घाटन करण्यात आले. या द्वारे गोव्याच्या भूमीत घडलेला संघर्ष, गोमंतकीय जनता आणि भूमीतील ऐतिहासिक महत्त्वाच्या घटना, घडामोडींचे प्रदर्शन पर्यटकांना तसेच भेट देणाऱ्यांना घडणार आहे.

यावेळी आमदार मायकल लोबो, पर्यटन संचालक सुनील अंचिपका, टीटीएजीचे अध्यक्ष नीलेश शहा, वॉटरफ्रंट एक्स्पिरिएन्सिसचे सीईओ नवीन चोप्रा आदी मान्यवर उपस्थित होते. सदर संग्रहालय ऐतिहासिक आग्वाद किल्ल्याच्या आवारात असून याद्वारे सन १६१२ पूर्वीच्या गोव्याच्या इतिहासाचा मागोवा घेता येणार आहे.

या संग्रहालयात आधुनिक तंत्राचा वापर करण्यात आला आहे. गोवा पर्यटन विकास महामंडळाच्या पुढाकारातून हे संग्रहालय साकारले असून संकल्पना ऊर्जा इंटरॅक्टिव्ह ॲंड डेल्टा टेक्नॉलॉजीसची आहे. आग्वाद किल्ल्यात स्थित तुरूंगातील सेलचा या संग्रहालयासाठी यथायोग्य वापर करण्यात आला आहे. तीन सेलमध्ये गोव्याच्या जडणघडणीचे पैलू मांडण्यात आले आहेत.