मोरजी/पेडणे : आगरवाडा येथील श्री सातेरी आणि पार्से येथील श्रीदेवी भगवती या भगिनींदरम्यान कोजागरी पौर्णिमेच्या निमित्ताने साजरा होणारा ‘देवाची पुनव’ हा पारंपरिक आणि भक्तिभावाने नटलेला उत्सव यंदा मोठ्या जल्लोषात पार पडला.
मुसळधार पावसाच्या सरींनी थोडा व्यत्यय आणला असला तरी भक्तांच्या उत्साहात किंचितही खंड पडला नाही. देवी भगवतीच्या आगमनानिमित्त दोन्ही गावांमध्ये भक्ती, आनंद आणि एकतेचा उत्सव अनुभवायला मिळाला.
दर तीन वर्षांनी पारंपरिक पद्धतीने साजरी होणारी ही ‘देवाची पुनव’ म्हणजे आगरवाडा आणि पार्से गावांच्या ऐक्याचे प्रतीक मानली जाते. सोमवारी रात्री पार्से येथून देवी भगवतीच्या तरंगांची मिरवणूक निघाली. मंगळवारी पहाटे आगरवाडा सीमेवर देवी भगवतीचे आगमन झाल्यावर आगरवाडा ग्रामस्थांनी तिचे पारंपरिक विधींनी स्वागत केले.
आगरवाडा गावात प्रवेश केल्यानंतर देवीच्या तरंगांचे प्रत्येक देवस्थानात पारंपरिक स्वागत झाले. सातेरी मंदिरात देवी भगवतीचा कलश पूजनासाठी ठेवला व दिवसभर सुवासिनी व भक्तगणांनी दर्शन घेतले. सायंकाळी श्रीदेवी भगवतीच्या महाजनांना आणि मानकऱ्यांना पारंपरिक पद्धतीने ‘कौल’ देण्यात आला.
त्यानंतर देवी भगवतीच्या तरंगांनी परतीचा प्रवास सुरू केला. बुधवारी पहाटे पार्से येथे देवीच्या प्रांगणात पोहोचल्यावर पारंपरिक विधी पार पाडून ‘देवाची पुनव’ उत्सवाची सांगता होईल.
देवस्थानचे पदाधिकारी जगन्नाथ देसाई यांनी सांगितले, की पेडण्याचा दसरोत्सव ज्या वर्षापासून सुरू झाला आहे त्याच वर्षापासून ‘तुळाभार’ हा नवस फेडण्याचा कार्यक्रम सुरू असतो. अनेकजण देवाकडे मागणे करतात आणि नंतर तुळाभार अर्पण करतात.
आतापर्यंत ज्या व्यक्तीच्या नावे मागणे केले जाते, त्याच्या वजनाएवढी साखर आणि गूळ नवस फेडण्याच्या वेळी अर्पण केले जाते. ही परंपरा कित्येक वर्षापासून सुरू आहे. प्रत्येकजण भक्तिभावाने तुळाभार अर्पण करतात.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.