परिसर गलिच्छ : मद्याच्या रिकाम्या बाटल्यांचा खच; कारवाई होत नाही

वास्को : मुरगाव-हार्बर येथे टेकडीवर अनैतिक धंद्यांना ऊत आला आहे. येथील परिसर गलिच्छ करणाऱ्यांवर कारवाई करण्यात यावी, अशी लेखी तक्रार येथील नागरिकांकडून मुरगाव पोलिस स्थानकात करण्यात आली आहे.

मुरगाव-हार्बर येथील टेकडीवरील सौंदर्य पर्यटकांना आकर्षित करते. या ठिकाणी लोकवस्ती तसेच श्री दामोदर ईश्वटी राष्ट्रोळी देवस्थान आहे. या टेकडीचे पर्यटनदृष्ट्या सुशोभीकरण करण्याचा मनोदय माजी मंत्री मिलिंद नाईक यांनी बाळगला होता व त्यादृष्टीने श्रीफळ वाढवून उद्‌घाटनही करण्यात आले होते. मात्र, आजपर्यंत या टेकडीचे सौंदर्यीकरण करण्यात आलेले नाही.

याविषयी मुरगाव पोलिस स्थानकात लेखी तक्रार करण्यात आल्याचे नागरिकांकडून सांगण्यात आले. मात्र, यावर कोणतीच कारवाई झालेली नाही. तसेच येथील मंदिरात शेकडो भाविक श्रींच्या दर्शनासाठी येतात. पुढच्या महिन्यात या मंदिरात उत्सव आहे. या उत्सवात भाविकांना त्रास होऊ नये यासाठी पोलिसांनी लवकरात लवकर कारवाई करून याबाबत उपाययोजना करावी, अशी मागणी करण्यात आली आहे.

नागरिकांना होतोय त्रास

या टेकडीवर अनैतिक धंदे करणाऱ्यांचे आयतेच फावते आहे. येथील परिसरात अस्ताव्यस्त टाकण्यात आलेल्या मद्याच्या रिकाम्या बाटल्यांवरून येथे मद्यप्राशन करण्याच्या प्रकारांत वाढ झाली आहे, हे स्पष्ट होते. प्रेमीयुगुलांकडून प्रेमाचे चाळेही या टेकडीवर होत आहेत. त्यामुळे येथे राहणाऱ्या नागरिकांना याचा त्रास होत आहे.