Action on Shacks in Anjuna: हणजूण भागातील 158 शॅक्सवर कारवाई अटळ

Action Inevitable Against 158 Shacks in Anjuna: कांदोळी-हणजूण किनारपट्टी क्षेत्रात उभारलेल्या 167 शॅक्सपैकी फक्त 9 शॅक्सकडे राज्य प्रदूषण नियंत्रण मंडळाची संमती आहे. उर्वरित 158 शॅक्स संमतीविना सुरू आहेत.

त्यामुळे या शॅक्सविरुद्ध कायद्यानुसार कोणती कारवाई करणे शक्य आहे, यासंदर्भातील माहिती द्यावी, असे निर्देश गोवा खंडपीठाने आज राज्य प्रदूषण नियंत्रण मंडळ आणि पर्यटन खात्याला दिले. मंगळवारी याबाबतची सुनावणी पुन्हा सुरू होईल.

राज्यातील समुद्रकिनाऱ्यावर पर्यटन खात्याने शॅक्स उभारण्यास परवानगी दिली आहे. यानुसार प्रत्येक शॅक्स चालकाने राज्य प्रदूषण नियंत्रण मंडळाची परवानगी घ्यायला हवी.

मात्र, कांदोळी-हणजूण परिसरात काही शॅक्स चालकांकडे ही संमती नसल्याचा दावा एका जनहित याचिकेत करण्यात आला होता. यावर खंडपीठाने प्रदूषण नियंत्रण मंडळाला यासंदर्भात तपासणी करून त्याचा अहवाल मागितला होता. या तपासणीत बहुतेकांकडे परवानगी नसल्याचे समोर आले.

न्यायालयाने याची गंभीर दखल घेत मंडळ आणि पर्यटन खात्याच्या वकिलांकडे कोणत्या कायद्याखाली या शॅक्स चालकांविरुद्ध कारवाई करणे शक्य आहे, याची माहिती मागितली आहे. त्यामुळे या शॅक्स चालकांविरुद्ध कारवाई अटळ आहे.

स्वेच्छा याचिका

राज्यातील अनेक शॅक्सचालक नियम धाब्यावर बसवून व्यवसाय करत आहेत. काही समुद्रकिनाऱ्यांंवर बेकायदा बांधकामे उभी आहेत. त्यासंदर्भात एका प्रकरणाची दखल घेत खंडपीठाने स्वेच्छा याचिका दाखल करून घेतली आहे.