Goa Accident: साखळी येथे तीन वाहनांचा अपघात; दुचाकीवरील तिघे जखमी

Accident At Sankhali: राज्यात अपघातांचे सत्र सुरुच आहे. रविवारी रात्री पर्वरीत एका वॅगनर चारचाकीचा अपघात झाला. यामध्ये एकाचा जागीच मृत्यू झाला आहे. तर रविवारी सकाळी  शिरोडा साखरवाळ येथे चालकाचे बसवरील नियंत्रण सुटल्याने बस झाडाला जाऊन धडकली. यात 11 प्रवासी जखमी झाले.

दरम्यान रविवारी दुपारी साखळी येथे तीन वाहनांचा अपघात झाला आहे. कारने दोन वाहनांना धडक दिल्याने हा अपघात घडला. या अपघातात तीघे जण जखमी झाले असून जखमींना गोमेकॉत उपचारासाठी दाखल करण्यात आले आहे.

याबाबत अधिक माहिती अशी की, साखळी गोकुळवाडी येथे एका कारने मालवाहू ट्रकला आणि दुचाकीला धडक दिली. कार साखळीहून डिचोलीच्या दिशेने जात होती. त्याचवेळी कारचालकाचा डोळा लागल्याने त्याचा गाडीवरील ताबा सुटला.

कारने विरूद्ध दिशेने येणाऱ्या महिंद्रा जितो या मालवाहू गाडीवर धडकून मागे असलेल्या एक्टीवा दुचाकीवर धडकली. या धडकेत तीघे जण जखमी झाले. तिघे जखमी भटवाडी कुडचिरे येथील असून उपचारासाठी त्यांना बांबोळी येथे गोमेकॉ रुग्णालयात दाखल करण्यात आले आहे.