ज्यामधून प्रवास केला, त्याच टँकरने चिरडले

तांबडीसुर्ल : ज्या टँकरमध्ये बसून प्रवास केल्या, त्याच टँकरने चिरडल्यामुळे एका वृद्धेला जीव गमवावा लागला. ही घटना तांबडीसुर्ल - बोळकर्णे मार्गावरील मेस्तवाडा येथे शनिवारी सकाळी 11 च्या सुमारास घडली.

लक्ष्मी राम गावकर (वय 70) असे या वृद्धेचे नाव असून बोळकर्णे बाजारात साहित्य खरेदी करून घरी जाताना हा अपघात घडला. याप्रकरणी डोंगरवाडा-साकोर्डा येथील टँकरचालक सत्यवान गावकर याला कुळे पोलिसांनी केली अटक आहे.

लक्ष्मी गावकर या आज सकाळी खरेदीसाठी बोळकर्णे बाजारात गेल्या होत्या. तेथे साहित्य खरेदी करून त्या पाण्याच्या टँकरमधून मेस्तवाडा येथे पोचल्या. तेथे त्यांनी टँकरच्या समोरूनच रस्ता ओलांडण्याचा प्रयत्न केला. त्याच वेळी चालकाने टँकर सुरू करून तो निघाला. यावेळी लक्ष्मी गावकर यांच्या डोक्यावरून टँकरचे चाक गेल्याने डोके फुटून मेंदू विखुरला होता, तर एक चाक मांडीवरून गेल्याने मांडीचे हाड मोडले होते.

मात्र, या प्रकाराची चालकाला काहीच माहिती नव्हती. तो पुढे जाऊन टँकरमधील पाणी ग्राहकाकडे पोचवून परत येत असताना त्याला मेस्तवाडा येथे अपघात झाल्याचे कळले. तेथे पोलिसांनी चौकशी केली असता, त्याने ही वृद्धा आपल्या टँकरमधून प्रवास करत होती, असे सांगितले. मात्र, हा अपघात कसा झाला, हे समजले नाही, असे पोलिसांना सांगितले. कुळे पोलिसांनी त्याला चौकशीसाठी संध्याकाळी पोलिस ठाण्यावर येण्यास सांगितले असता, त्याने आपल्याच टँकरखाली येऊन ही वृद्धा ठार झाल्याचे सांगून गुन्हा कबूल केला. पोलिसांनी याप्रकरणी चालक सत्यवान गावकर याला अटक केली आहेे. लक्ष्मी गावकर हिच्या मागे चार पुत्र, चार विवाहित कन्या, नातवंडे असा परिवार आहे.

याची माहिती मिळताच कुळेचे पोलिस निरीक्षक संजय दळवी सहकाऱ्यांसह अपघातस्थळी त्वरित दाखल झाले. पोलिस उपअधीक्षक सी. एल. पाटील यांनीही या अपघाताची माहिती घेतली. लक्ष्मी गावकर यांचा मृतदेह गोमेकॉत उत्तरीय तपासणीसाठी पाठवला आहे. उपनिरीक्षक अजय धुरी यांनी पंचनामा केला.