Bicholim Accident: डिचोली-अस्नोडा रस्त्यावर बसची कारला धडक; आलिशान कारचे नुकसान

Valshi Junction Accident

डिचोली: डिचोली-अस्नोडा मुख्य रस्त्यावर खासगी प्रवासी बस आणि आलिशान मोटारगाडी यांच्यात झालेल्या भयानक अपघातात सुदैवाने जीवितहानी टळली. मात्र या अपघातात प्रवासी बसमधील एक युवती किरकोळ जखमी झाली.

हा अपघात आज (मंगळवारी) सकाळी व्हाळशी जंक्शनजवळ घडला. यासंबंधी उपलब्ध माहिती अशी की, आलिशान मोटारगाडी उजव्या बाजूने दुसऱ्या लेनमध्ये घेताना मागाहून वाळपईहून पणजीला जाणाऱ्या खासगी प्रवासी बसने कारला जोरदार धडक दिली. या धडकेबरोबर कार फरफटत पुढे गेली. तर बसमधील एक युवती पुढील सीटला आपटल्याने ती किरकोळ जखमी झाली.

अपघातग्रस्त आलिशान कार एक महिला चालवत होती. या अपघातात त्या सुखरूप बचावल्या. अशी माहिती मिळाली आहे. या अपघातात कारची मोठ्या प्रमाणात मोडतोड झाली. क्रेनच्या साहाय्याने कार रस्त्यावरुन बाजूला करण्यात आली. हा अपघात आपापसात मिटवण्यात आल्याची माहिती मिळाली आहे.