'आप'च्या पहिल्या यादीत भंडारी, ख्रिस्तींना प्राधान्य

पणजी : आम आदमी पार्टीने गोवा विधानसभा निवडणुकीसाठी उमेदवारांची पहिली यादी जाहीर केली आहे. मात्र या यादीत भंडारी आणि ख्रिस्ती उमेदवारांना प्राधान्य दिलं आहे. काल शुक्रवारी जाहीर केलेल्या यादीत 4 भंडारी समाजातील तर 4 ख्रिस्ती उमेदवारांचा समावेश आहे. त्यामुळे निवडणुकीसाठी आपने वेगळं कार्ड खेळल्याची चर्चाही रंगू लागली आहे.

आपने (Aam Aadmi Party) उमेदवारी दिलेल्या माजी मंत्री एलिना साल्ढाणा यांनी भाजपला (BJP) सोडचिठ्ठी देत आपमध्ये प्रवेश केला होता. त्यांना उमेदवारी देत कुठ्ठाळी भागातील ख्रिस्ती वर्गाला आकर्षित करण्याचा प्रयत्न आपने(AAP) केला आहे. यासोबतच नावेलीत प्रतिमा कुतिन्हो, बाणावलीत वेन्झी व्हिएगस, आणि कुडतरीमध्ये डॉमनिक गावकर या ख्रिस्ती उमेदवारांनी आपने निवडणुकीच्या रिंगणात उतरवलं आहे.

दुसरीकडे शिरोड्यातून माजी मंत्री महादेव नाईक, पर्ये मतदारसंघात विश्वजीत कृष्णराव राणे, दाबोळीत मगोपमधून आपमध्ये दाखल झालेले प्रेमानंद नाणोस्कर, वाळपईमध्ये सत्यविजय नाईक या भंडारी समाजाच्या उमेदवारांना आपने संधी दिली आहे. गोव्यात आपचे सरकार स्थापन झाल्यास भंडारी समाजाचा मुख्यमंत्री होईल अशी घोषणा आपचे सर्वेसर्वा आणि दिल्लीचे मुख्यमंत्री अरविंद केजरीवाल (Arvind Kejriwal) यांनी केली होती. आता निवडणुकीतही भंडारी समाजाच्या उमेदवारांना आपकडून संधी दिली जात आहे. पुढील याद्यांमध्येही आपकडून भंडारी समाजातील उमेदवारांना संधी मिळण्याची शक्यता आहे.