फातोर्ड्यातील नॉर्बट डायस या युवकाच्‍या इन्‍स्‍टाग्रामवर पेज मॉर्फ करून त्‍यावरून छत्रपती शिवाजी महाराजांची बदनामी करण्‍याचा प्रकार घडला असून यामुळे डायस याला एका जमावाकडून नाहक मारहाण झाल्‍याचा प्रकार उघडकीस आला आहे.
याप्रकरणी फातोर्डा पोलिसांनीही त्‍या युवकाची कैफियत ऐकून न घेता उलट त्‍याला मारहाण केली, असा आरोप या युवकाच्‍या कुटुंबीयांनी केला आहे.
आज विजय सरदेसाई यांच्‍याबरोबर नॉर्बट डायस व त्‍याच्‍या कुटुंबीयांनी पत्रकार परिषद घेऊन कैफियत मांडली.
कुणीतरी आपले इन्‍स्‍टाग्राम पेज मॉर्फ करून हा मजकूर समाज माध्‍यमावर टाकल्‍याचे आपल्‍या लक्षात आल्‍यावर आपण पोलिस तक्रारीसाठी बाहेर पडत असताना काहीजण आपण आर्लेम येथे काम करत असलेल्‍या गॅरेजजवळ आले आणि त्‍यांनी मारहाण केली. फातोर्डा पोलिस स्‍थानकाबाहेरही मारहाण केली.
दरम्‍यान, हे असले प्रकार अल्‍पसंख्‍यांक समाजातील लाेकांसंदर्भात द्वेष पसरविण्‍यासाठी मुद्दामहून केले जात आहेत, असे संदेश पसरवून धार्मिक कलह निर्माण करण्‍याचा हा प्रयत्‍न असून पोलिसांनी याबाबत कडक कारवाई करावी,असे विजय सरदेसाई यांनी सांगितले. डायसला मुद्दाम कुणीतरी गुंतविण्‍याचा प्रयत्‍न करीत आहेत. कारवाई न झाल्यास विधानसभेत आवाज उठवू, असा इशारा त्‍यांनी दिला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
