Goa School: एक दिवस ‘विनादप्तर शाळा’; ‘सीटीएन’ची अनोखी संकल्पना

Goa School: कुडचडे येथील श्रीमती चंद्रभागा तुकोबा नाईक विद्यालयात ‘विनादप्तर शाळा’ ही संकल्पना मूर्त स्वरूपात आणली आहे. आठवड्यातून एक दिवस मुले दप्तराविना शाळेत येणार व चार भिंतींच्या बाहेर पडून मुक्त वातावरणात, खुल्या वर्गात शालेय अभ्यासक्रमाबरोबरच जीवनाचा पाठ शिकणार आहेत. त्यामुळे मुलांत खुशीचे वातावरण आहे.

पूर्व प्राथमिक, प्राथमिक व माध्यमिक स्तरावरील विद्यार्थी या विनादप्तर शाळा संकल्पनेतून अभ्यासक्रम शिकणार असल्याचे या शाळेचे मुख्याध्यापक विजयकुमार कोप्रे देसाई यांनी सांगितले.

लहान मुले पुस्तक, वह्या व इतर अवजड दप्तराच्या ओझ्याखाली दबली जातात. या ओझ्यामुळे मुलांची शारीरिक व मानसिक वाढ एकप्रकारे खुंटली जाते.

मुक्त वातावरणात बहरतील मुले

• चार भिंतींच्या आड आठवड्यातील सहा दिवस पुस्तक, वही व फळा यात अडकलेल्या विद्यार्थ्यांना काहीतरी वेगळे व विशिष्ट प्रकारचे शिक्षण देणारी ही संकल्पना आहे.

• आठवड्यातील शनिवार हा विनादप्तर शाळा संकल्पनेसाठी ठेवला आहे. यासाठी खास वेळापत्रक तयार करण्यात आले आहे.

• शाळेच्या प्राथमिक विद्यार्थ्यांना रेल प्रवासात कोणती खबरदारी घ्यावी, रेल्वेचे तिकीट कुठे घ्यावे, प्लॅटफॉर्म तिकीट का घ्यावे व कसे घ्यावे. याचा पाठ दिला.

• मुलांना टपाल कार्यालय, बँक, नगरपालिका, पंचायत व इतर कार्यालये कशी चालतात याची माहिती देण्यासाठी या शाळेचा उपयोग होतो.