Tivim Crime: पैशांच्या वसुलीसाठी अभियंत्याचे अपहरण; कोलवाळ पोलिसांनी तिघा संशयितांच्या आवळल्या मुसक्या
Tivim Crime: थिवी येथे एका बांधकाम क्षेत्रातील अभियंत्याचे अपहरण करून त्यांची लुबाडणूक करण्याचा धक्कादायक प्रकार उघडकीस आला आहे. याप्रकरणी कोलवाळ पोलिसांनी तिघा संशयितांना सावंतवाडी (महाराष्ट्र) येथून अटक करून त्यांनी अपहरणासाठी वापरलेली कारगाडी जप्त केली आहे. बलवीर सिंग गुर्जर (वय ३३), राजकुमार चौधरी (वय ३३, दोघेही रा. थिवी व मूळ राजस्थान) आणि विरेंदर कुमार (वय ५९, रा. थिवी व मूळ दिल्ली) अशी अटक केलेल्या संशयितांची नावे आहेत. हा अपहरणाचा प्रकार रविवारी २८ एप्रिल रोजी संध्याकाळी ४.३० ते रात्री ९.३० या दरम्यान घडला.
दरम्यान, या प्रकरणी फिर्यादी हितेश जंगीड (रा. माडेल थिवी व मूळ राजस्थान) यांनी सोमवारी २९ एप्रिल रोजी सकाळी कोलवाळ पोलिसांत तक्रार दिली. संशयित बलवीर सिंग व राजकुमार यांचा टाईल्स फिटींगचा व्यवसाय असून विरेंदर कुमार हा त्यांच्याकडे कामाला होता. फिर्यादी हितेश जंगीड हे सिव्हिल इंजिनिअर असून ते राजस्थानमधीलच असल्याने त्यांची व्यवसायातून ओळख झाली होती. फिर्यादी हितेश जंगीड याने व्यवसायातील काही रक्कम संशयितांना द्यायची होती. ही रक्कम वसूल करण्याच्या हेतूने संशयितांनी फिर्यादी हितेश जंगीड यांना आपल्या कारमध्ये बसवले व त्यांना मारहाण करीत त्यांच्याकडे पैसे मागितले.
नंतर एका निर्जनस्थळी असलेल्या खोलीमध्ये नेऊन तिथेही त्यांना मारहाण केली. फिर्यादी हितेश यांच्याकडे पैसे नसल्याचे पाहून संशयितांनी त्यांच्या हातातील अंगठी, खिशातील ५ हजार रुपये रोकड व मोबाईल फोन काढून घेऊन रात्री ९.३० च्या सुमारास त्यांना त्यांच्या दुचाकीकडे आणून सोडले.
कोलवाळ पोलिसांची कामगिरी
यासंबंधीची तक्रार दाखल होताच कोलवाळ पोलिसांनी संशयितांचा शोध घेतला. संशयित सावंतवाडी येथे असल्याची माहिती मिळाल्यावर पोलिसांनी तिथे जाऊन तिन्ही संशयितांना कारसह ताब्यात घेतले व पोलिस स्थानकात आणून रीतसर अटक केली. संशयितांविरुद्ध अपहरण व लुबाडणुकीचा गुन्हा नोंद केला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.