Goa Crime News: गुजरातमधील बेपत्ता अल्पवयीन मुलगी गोव्यात सापडली; मित्रांसोबत आली होती फिरायला

कधीतरी जीवाचा गोवा केला पाहिजे असं प्रत्येकाला वाटतं. पण कुणी यासाठी गोव्याला घरातून पळून येत नाही... होय, गुजरातमधून गोव्याला फिरण्यासाठी पळून आल्याचं एक प्रकरण समोर आलं आहे. एक अल्पवयीन मुलगी दोन अल्पवयीन मुलांसोबत गोव्याला पळून आली. हे तिघेही 16 जुलैपासून बेपत्ता होते. घरी आई वडिलांना न सांगता मुलगी या दोन मुलांसोबत गुजरातमधून गोव्याला आली. हे तिघेही गोव्याला फिरायला आले होते. ते इथे एक रुम करुन राहिले.

पोलिसांनी दिलेल्या माहितीनुसार, ही अल्पवयीन मुलगी चांदखेडा, अहमदाबाद येथील रहिवासी आहे. मात्र अचानक 16 जुलै रोजी ती बेपत्ता झाली. मुलीच्या वडिलांना तात्काळ पोलिस ठाण्यात तक्रार नोंद केली. पोलिसात तक्रार नोंद केल्यावर पोलिसांनी त्वरीत तपास सुरु केला होता. मात्र तब्बल आठ दिवसांनी ती गोव्यातील पोबुंर्का येथे सापडली. पोबुंर्का येथे या मुलांचा मोबाईल नंबर पर्वरी पोलिसांनी ट्रेस केला.

दरम्यान, पर्वरी पोलिसांना त्वरीत गुजरात पोलिसांशी संपर्क साधला. त्यानंतर गुजरात पोलिसांचे पथक गोव्यात पोहोचले. त्यानंतर ते या मुलांना गुजरातला घेवून गेले.