Goa Accident Death: बहिणीला शाळेत सोडायला गेलेली युवती अपघातात ठार

Goa Accident Death: शिरदोन येथे दोन दुचाकी वाहनांमध्‍ये झालेल्‍या अपघातात संजना सावंत (21, मधलावाडा-शिरदोन) या युवतीचा मृत्यू झाला.

तर, तिची बहीण अक्षता सावंत (17, शिरदोन) आणि दुसरा दुचाकीस्‍वार ओमकार आरोस्कर (18, पिलार) गंभीर जखमी झाला असून, त्‍यांच्‍यावर इस्‍पितळात उपचार सुरू आहेत.

आगशी पोलिसांनी दिलेल्या माहितीनुसार, हा अपघात आज मंगळवारी सकाळी घडला. संजना सावंत आणि तिची बहीण अक्षता सावंत शिरदोनकडून पिलारच्या दिशेने आपल्या दुचाकीने (जीए ०७ एजे ३५५९) जात होती तर ओमकार आरोस्कर हा शिरदोनच्या दिशेने दुचाकी (जीए ०७ व्ही ०८१२) घेऊन येत होता.

शिरदोन बाजाराजवळच्या रस्त्यावर दोन्ही वाहनांमध्ये समोरासमोर धडक झाली. त्यात संजना उसळून रस्त्यावर पडली आणि तिच्या डोक्याला गंभीर दुखापत होऊन रक्तस्राव झाला.

गोमेकॉत नेताना वाटेत तिची प्राणज्योत मालवली. अक्षता सावंत आणि ओमकार आरोस्कर यांच्‍यावर गोमेकॉत उपचार सुरू आहेत.

पोलिसांनी ओमकार आरोस्कर याच्‍याविरोधात भादंसच्या कलम २७९, ३३७, ३०४ (अ) अंतर्गत गुन्हा नोंद केला आहे.

पिलार येथे शिक्षण

अक्षता ही पिलार येथील फादर आग्नेल उच्च माध्‍यमिक विद्यालयात बारावी वाणिज्य शिकत आहे. तिला शाळेत सोडण्यासाठी संजना दुचाकीने आली होती. तर, ओमकार हा त्‍याच विद्यालयाचा बारावी कला शाखेचा विद्यार्थी आहे. तो शिरदोन येथे आपल्या मित्राला आणण्यासाठी जात होता.