Goa Loksabha: गोव्यात 70 टक्के लोक भाजप विरोधात; आप आमदार वेंझी व्हिएगस यांचा दावा

Goa Loksabha Election

गोव्यात इंडिया आघाडीच्या उमेदवारांची घोषणा झाल्यानंतर प्रचाराने वेग घेतला आहे. राज्यात भाजप, काँग्रेस आणि आरजीच्या उमेदवारांचा जोरात प्रचार सुरु आहे. आम आदमी पक्षाने आघाडीला समर्थन दिल्याने पक्षाचे आमदार आघाडीच्या नेत्यांचा प्रचार करत आहेत.

बाणावलीचे आमदार दक्षिणेत काँग्रेस उमेदवार विरियातो फर्नांडिस यांचा प्रचार करत असून, राज्यात 70 टक्के लोक भाजप विरोधात असल्याचा दावा त्यांनी केला आहे.

इंडिया आघाडीच्या प्रचारानिमित्ताने मी दक्षिण गोव्यातील 15 मतदारसंघात फिरलो आहे. लोक भाजपला कंटाळली असून, 70 टक्के लोक भाजप विरोधात आहेत. राज्यातील लोक अनिश्चितता आणि महागाई या सारख्या समस्यांचा सामना करत असल्याचे व्हिएगस म्हणाले.

भाजप नेते देखील पक्षाच्या बैठकांसाठी जातायेत त्यांना चढ्या दराने पेट्रोल भरावे लागत आहे. घरगुती गॅसच्या किंमती वाढल्या आहेत. सर्वत्र भाजप नेतृत्वातील सरकारच्या विरोधात वातावरण पाहायला मिळत आहे, असे व्हिएगस म्हणाले.

किनारी भागात राहणारे नागरिक त्यांचे घर केव्हाही तोडले जाऊ शकते या भीतीखाली जगत आहेत, सीआरझेड प्रकरणी कोणतेही धोरण निश्चित केले नसल्याचे आरोप व्हिएगस यांनी केला.

इंडिया आघाडीतील सर्व पक्ष एकत्र आले असून, आगामी २०२७ च्या विधानसभा निवडणुकीत देखील ही एकजूट अशीच राहील, असेही व्हिएगस म्हणाले.

अशी होणार लोकसभा लढत

उत्तर गोवा - श्रीपाद नाईक (भाजप), रमाकांत खलप (काँग्रेस) आणि मनोज परब (आरजी)

दक्षिण गोवा- पल्लवी धेंपे (भाजप), विरियातो फर्नांडिस (काँग्रेस) आणि रुबर्ट परेरा (आरजी)