Dead Whale Fish: तळपण समुद्रकिनाऱ्यावर आढळला 30 फूट लांब कुजलेल्या अवस्थेतील व्हेल मासा

पणजी: दक्षिण गोव्यातील प्रसिद्ध तळपण समुद्रकिनाऱ्यावर रविवारी दुपारी ३.३० च्या सुमारास पर्यटक व स्थानिक नागरिकांनी एक दुर्मीळ दृश्य पाहून लगेच जीवरक्षकांना बोलावून घेतले आणि जीवरक्षकांनी वन खात्यातील अधिकाऱ्यांना बोलावून घेतले. हे दुर्मीळ दृश्य म्हणजे व्हेल माशाचा मृतदेह होता.

सुमारे २५ ते ३० फूट लांबीचा अर्धवट कुजलेला व्हेल माशाचा मृतदेह लाटांच्या जोराने किनाऱ्यावर येऊन धडकला असा प्राथमिक अंदाज अधिकाऱ्यांतर्फे वर्तविण्यात आला.

दृष्टी मरीनचे जीवरक्षक या घटनेला सर्वप्रथम सामोरे गेले. समुद्रकिनाऱ्यांवरील जीवजंतू अथवा सागरी प्रजातींच्या मृतदेहासंबंधी ठरवलेल्या आपत्कालीन प्रोटोकॉलनुसार त्यांनी तात्काळ वन विभागाला माहिती दिली.

वन विभागाचे अधिकारी घटनास्थळी दाखल झाले व त्यांनी मृत व्हेलची तपासणी करून प्राथमिक अहवाल तयार केला व त्यानंतर, सुरक्षा कारणास्तव पर्यटकांना त्या भागापासून दूर ठेवण्यात आले.

दृष्टी मरीनच्या कर्मचाऱ्यांनीही अधिकाऱ्यांना मदत करून मृतदेह सुरक्षितपणे विल्हेवाट लावण्याची (पुरण्याची) प्रक्रिया पूर्ण केली.