Goa Government job : बीएसएनएलला राज्य सरकारकडून 29 जागा

Goa Government job : गोव्‍यातील दूरध्‍वनी आणि मोबाईल क्षेत्रातील कनेक्‍टीव्‍हिटी वाढविण्‍यासाठी बीएसएनएलने अत्‍याधुनिक साधनसुविधा वाढविण्‍याची राज्‍यव्‍यापी मोहीम हाती घेतली असून ती मार्गी लावण्‍यासाठी गोवा सरकारने आपल्‍या मालकीच्‍या २९ जमिनी बीएसएनएलच्‍या ताब्‍यात देण्‍याचा निर्णय घेतला आहे. या कामाला ऑक्‍टोबरच्‍या दरम्‍यान सुरुवात होण्‍याची शक्‍यता आहे.

बीएसएनएल तांत्रिक विभागाच्‍या सल्‍लागार समितीची बैठक आज खासदार फ्रान्‍सिस सार्दिन यांच्‍या अध्‍यक्षतेखाली झाली.

सार्दिन म्हणाले, बीएसएनएलकडून गोव्‍यात सुविधांचे जाळे वाढविण्‍यात येणार आहे आणि त्‍यासाठी राज्‍य सरकार त्‍यांना जागा देणार अशी माहिती दिली. ज्‍या ठिकाणी कनेक्‍टीव्‍हिटीचा प्रश्न आहे, तिथे टॉवर्स उभारणार असून अन्‍य सुविधा निर्माण करण्‍यासाठी या जमिनींचा वापर होईल.

समस्यांवर चर्चा

या बैठकीत लोकांना लँडलाईन संदर्भांतील येणाऱ्या समस्‍यांवर चर्चा झाली. काही तांत्रिक कारणांमुळे या समस्‍या निर्माण झाल्‍या आहेत. मात्र पावसाळा संपल्‍यावर त्‍या दूर करू, असे आश्‍वासन आपल्‍याला बीएसएनएलच्‍या अधिकाऱ्यांनी दिले आहे. ग्रामीण भागात बीएसएनएल बाबत अनेक तक्रारी आहेत. त्या कमी करण्याचा प्रयत्न असेल, असे सार्दिन यांनी सांगितले.