GST Collection In Goa: राज्याच्या जीएसटी संकलनात 22 टक्क्यांनी घट

गेल्या वर्षीच्या तुलनेत राज्याच्या डिसेंबर महिन्याच्या जीएसटी संकलनात २२ टक्क्यांनी घट झाली आहे. डिसेंबरमध्ये जीएसटीद्वारे एकूण ४६० कोटी रुपये महसूल गोळा करण्यात आला आहे. मागच्या वर्षीच्या डिसेंबरमध्ये हेच संकलन ५९२ कोटी रुपये इतके होते. केंद्रीय अर्थ खात्याने ही माहिती जाहीर केली आहे.

राज्यात एप्रिल ते ऑगस्ट दरम्यान जीएसटी संकलन कमी झाले होते, सप्टेंबर महिन्यात त्यात ३३ टक्के तर ऑक्टोबरमध्ये ३२ टक्के वाढ झाली होती; मात्र नोव्हेंबर आणि डिसेंबरमध्ये त्यात पुन्हा घट झाली. राज्यात पर्यटन हंगाम सुरू होताच हे संकलन वाढण्याची अपेक्षा केली जात होती. यानुसार ऑक्टोबर ते मार्च या काळात संकलन वाढण्याची शक्यता होती.

देशाचा विचार केल्यास डिसेंबर महिन्यात सलग दहाव्या महिन्यात जीएसटी संकलन १.४ लाख कोटी रुपयांच्या वर गेले आहे. यामध्ये सीजीएसटीचा २६,७११ कोटी रुपये, एसजीएसटीचा ३३,३५७ कोटी रुपये, आयजीएसटी ७८, ४३४ कोटी रुपये आणि उपकराच्या माध्यमातून 11, 005 कोटी रूपये महसूल प्राप्त झाला आहे.

डिसेंबर महिन्यात देशाचे जीएसटी (वस्तू आणि सेवा कर) करसंकलन दीड लाख कोटी रुपये झाले आहे. नोव्हेंबरच्या तुलनेत अडीच टक्के वाढ झाली आहे. डिसेंबर महिन्यातील जीएसटी कर संकलनापेक्षा ही रक्कम १५.२ टक्के जास्त असल्याची आकडेवारी केंद्रीय अर्थ मंत्रालयाने आज प्रसिद्धी केली आहे.