Morjim News: शॉर्टसर्किटमुळे पर्यटन खात्याची दोन शौचालये खाक

मोरजी, ता. १७ (प्रतिनिधी) : टेंबवाडा किनारी भागातील गोवा पर्यटन खात्याच्या दोन शौचालयांना शॉर्टसर्किटमुळे आग लागल्याने किमान २५ लाखांचे नुकसान झाले.

ही घटना बुधवार, १७ रोजी सकाळी घडली. स्थानिकांनी आग विझविण्याचा प्रयत्न केला. परंतु आगीचा भडका एवढा मोठा होता की त्यांना ती विझविणे शक्य झाले नाही, त्यामुळे फायबरची असलेली दोन्ही शौचालये जळून खाक झाली. शॉर्टसर्किटमुळे पहिल्यांदा दिव्यांगांसाठी असलेल्या खास शौचालयाला आग लागली. स्थानिकांना कळताच त्यांनी पेडणे अग्निशमन दलाला संपर्क केला. परंतु बंब अर्ध्या तासानंतर आल्यामुळे त्याचा काहीही फायदा झाला नाही. त्यामुळे दोन शौचालये पूर्णपणे जळून खाक झाली.

पक्की शौचालये हवीत

ज्या पद्धतीने शॉर्टसर्किट होऊन फायबरची ही शौचालये जळून खाक झाली. त्या नजरेतून आता सरकारने किनारी भागात कॉंक्रिटची पक्की शौचालये उभारावीत, अशी मागणी स्थानिक पंच पवन मोरजे यांनी केली.