Goa Health: एक वर्षाच्या चिमुकल्याला हृदयविकाराच्या झटक्यातून वाचवण्यात यश! पणजीच्या रुग्णवाहिका पथकाने दाखवले प्रसंगसावधान

पणजी: पणजीतील सीसीए रुग्णवाहिका पथकाने एका 1 वर्ष 3 महिन्यांच्या बालकाचा प्राण वाचवत आपत्कालीन वैद्यकीय सेवांमध्ये असलेल्या समर्पणाचे उत्तम उदाहरण घालून दिले आहे. या मुलाला अचानक अकडी (seizures) आणि हृदयविकाराचा झटका (Cardiac Arrest) आला. मात्र, इएमटी-ए वैशाली वेर्णेकर आणि चालक अब्दुल शेख यांनी तात्काळ उपचार करत इंट्युबेशन आणि व्हेंटिलेटर सपोर्ट देऊन गोवा वैद्यकीय महाविद्यालयात चिमुकल्याला सुरक्षितपणे दाखल केले.

तातडीच्या मदतीमुळे चिमुकल्याचे प्राण वाचले

दरम्यान, या आरोग्य सेवकांनी तातडीने दिलेल्या मदतीमुळे चिमुकल्याचे प्राण वाचले आणि त्याच्या कुटुंबीयांना मोठा दिलासा मिळाला. या कठीण परिस्थितीत त्यांनी दाखवलेली तत्परता, कौशल्य आणि संवेदनशीलता यासाठी त्यांचे विशेष कौतुक करण्यात आले. आपत्कालीन वैद्यकीय सेवा ही आरोग्य व्यवस्थेची अत्यंत महत्त्वाची बाजू असून अशा समर्पित कर्मचाऱ्यांमुळेच ती अधिक प्रभावी ठरते, असे आरोग्यमंत्री विश्वजित राणे यांनी म्हटले.

आरोग्यमंत्र्यांनी कौतुक केले

या जीवनरक्षक सेवेसाठी इएमटी- ए वैशाली वेर्णेकर आणि चालक अब्दुल शेख यांचे आरोग्यमंत्री विश्वजित राणे यांनी मनःपूर्वक आभार मानले. अशा समर्पित आरोग्य सेवकांमुळे आपली आरोग्य यंत्रणा अधिक सक्षम होत आहे, असेही त्यांनी नमूद केले.