पणजी: कुजिरा येथील अटल स्टेडियमवर होणाऱ्या ३७व्या पश्चिम विभागीय ज्युनियर ॲथलेटिक्स स्पर्धेसाठी यजमान सज्ज झाले असून गोव्याचे १२४ ॲथलीट्स पदकासाठी कौशल्य पणाला लावतील. स्पर्धा २७ ते २९ सप्टेंबर या कालावधीत होईल.
गोवा ॲथलेटिक असोसिएशनतर्फे भारतीय ॲथलेटिक्स महासंघ आणि गोवा क्रीडा प्राधिकरणाच्या सहकार्याने स्पर्धा घेण्यात येत आहे.
स्पर्धेतील सहभागी ॲथलीट्सना गुरुवारी खेळण्याचे साहित्य प्रदान करण्यात आले. यजमान संघातील खेळाडूंना शुभेच्छा देताना गोवा ॲथलेटिक असोसिएशनचे अध्यक्ष ॲड. नरेंद्र सावईकर यांनी सांगितले, की स्पर्धेच्या सुसूत्र आयोजनावर भर देण्यात आला असून स्पर्धेच्या माध्यमातून ज्युनियर पातळीवरील दर्जेदार गुणवत्तेला व्यासपीठ मिळत आहे.
गोव्यातील ॲथलीट्सनही मोठी संधी असून चांगले व्यासपीठ प्राप्त होत आहे. त्यांच्याकडून पदकांची अपेक्षा आहे, निश्चितच ते अभिमानास्पद कामगिरी बजावतील या विश्वास वाटतो.
तीन दिवस चालणाऱ्या या स्पर्धेत यजमान गोव्यासह छत्तीसगड, मध्य प्रदेश, राजस्थान, गुजरात, महाराष्ट्र, दमण-दीव, दादरा नगर हवेली येथील क्रीडापटू भाग घेतील. विविध संघांचे मिळून सुमारे ८०० स्पर्धक भाग घेतील. स्पर्धा विविध प्रकारांत होईल.
स्पर्धेला मुख्यमंत्री डॉ. प्रमोद सावंत, क्रीडामंत्री रमेश तवडकर, गोवा क्रीडा प्राधिकरणाकडून उत्स्फूर्त पाठिंबा लाभल्यामुळे आम्ही ही मोठी स्पर्धा घेऊ शकलो, असे ॲड. सावईकर यांनी सांगितले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
