Super Cup 2025: पंजाब FC, मुंबई सिटीने नोंदविले विजय! गोकुळम केरळा, स्पोर्टिंग क्लब दिल्लीला नमविले; मोहन बागानला धेंपो क्लबचे आव्हान

पणजी: एआयएफएफ सुपर कप फुटबॉल स्पर्धेत पंजाब एफसी व मुंबई सिटी एफसीने सोमवारी एकतर्फी विजयाची नोंद केली.

बांबोळी येथील ॲथलेटिक्स स्टेडियमवर क गट लढतीत पंजाब एफसीने गोकुळम केरळास ३-० असे सहजपणे हरविले. पानाजिओटिस डिल्मपेरिस यांच्या मार्गदर्शनाखालील संघाचे तिन्ही गोल पूर्वार्धातील खेळात झाले. गुरसिमरत सिंग याच्या स्वयंगोलमुळे दुसऱ्या मिनिटास कोंडी फुटली.

नंतर निखिल प्रभू याने ११व्या, तर प्रिन्सटन रिबेलो याने ४३व्या मिनिटास प्रत्येकी एक गोल केला. सामन्यातील अखेरची सहा मिनिटे गोकुळम केरळास दहा खेळाडूंसह खेळावे लागले. ट्रिजॉय डायस याच्या अखिलाडूवृत्तीबद्दल थेट रेड कार्ड दाखविण्यात आले. फातोर्डा येथील पंडित जवाहरलाल नेहरू स्टेडियमवर दोन गोल करणारा विक्रम प्रताप सिंग मुंबई सिटीच्या ड गट लढतीतील विजयाचा शिल्पकार ठरला.

त्यांनी नव्याने नामकरण झालेल्या स्पोर्टिंग क्लब दिल्ली (पूर्वाश्रमीचे हैदराबाद एफसी) संघाचा ४-१ असा लीलया पराभव केला. विक्रम याने नवव्या व सामन्याच्या भरपाई वेळेत प्रत्येकी एक गोल नोंदविला. याशिवाय अर्जेंटिनाचा परेरा दियाझ याने सातव्या, तर स्पॅनिश होर्गे ऑर्तिझ याने ३२व्या मिनिटास गोल नोंदवून मुंबई सिटी स्थिती मजबूत केली. स्पोर्टिंग क्लब दिल्लीचा एकमात्र गोल ब्राझीलियन आंद्रेई अल्बा याने पेनल्टी फटक्यावर ७५व्या मिनिटास कमी केली.

मोहन बागानला धेंपो क्लबचे आव्हान

सुपर कप स्पर्धेच्या अ गटात मंगळवारी (ता. २८) फातोर्डा येथील पंडित जवाहरलाल नेहरू स्टेडियमवर बलाढ्य मोहन बागान सुपर जायंट्सला गोव्याचा धेंपो स्पोर्टस क्लब आव्हान देणार आहे. धेंपो क्लब संघात सर्व भारतीय नवोदित फुटबॉलपटू आहेत, तर मोहन बागान संघ पूर्ण ताकदीनिशी आला आहे.

मात्र अगोदरच्या लढतीत कोलकात्यातील ईस्ट बंगालला २-२ गोलबरोबरीत रोखलेल्या धेंपो क्लबला मोहन बागान निश्चितच कमी लेखणार नाहीत. त्यांनी पहिल्या लढतीत चेन्नईयीन एफसीला २-० असे नमविले. ‘‘मागील लढतीतील बरोबरीमुळे संघ खूपच प्रेरित आहे, आता आम्ही पुढील सामन्यात चेंडूवर वर्चस्व राखण्यासाठी प्रयत्न करू. पहिल्या सामन्यातील सकारात्मकतेच्या आधारे खेळाडू आगामी लढतीसाठी पूर्ण सज्ज आहेत हा विश्वास मला वाटतो,’’ असे धेंपो क्लबचे प्रशिक्षक समीर नाईक यांनी सांगितले.