Ranji Trophy: 6 बाद 84 वरुन गोव्याचे शानदार कमबॅक! दर्शन-यशची शतकी भागीदारी; पहिल्या दिवसाअखेर संघाने ओलांडला द्विशतकाचा टप्पा

पणजी: फलंदाजांची कमजोर कामगिरी कायम राहिल्यामुळे रणजी करंडक क्रिकेट सामन्यात गोव्याभोवती विदर्भाचा संघ पकड घट्ट आवळत होता, अतिशय प्रतिकुल परिस्थितीत अनुभवी दर्शन मिसाळ आणि उदयोन्मुख यश कसवणकर जोडी एकत्र आली. या डावखुऱ्या फलंदाजांनी शतकी भागीदारी केल्यामुळे संघाला पहिल्या दिवसअखेर स्पर्धेत यंदा प्रथमच द्विशतक मजल मारता आली.

जामठा-नागपूर येथील व्हीसीए स्टेडियमवर एलिट अ गट चार दिवसीय सामन्याला सोमवारपासून सुरवात झाली. जम्मू-काश्मीरविरुद्ध मागील लढतीत अनुक्रमे तीन व पाच गडी बाद केलेल्या मध्यमगती नचिकेत भुते याने गोव्याची स्थिती खराब केली होती. गोव्याचा डाव उपहापानंतर लगेच ६ बाद ८४ धावा असा गडगडला होता.

मात्र यश कसवणकर (नाबाद ५१, १७७ चेंडू, ४ चौकार) व दर्शन मिसाळ (५१, १०८ चेंडू, ५ चौकार, १ षटकार) जोडीने जबरदस्त संयमाने फलंदाजी करत खिंड लढविली. त्यांनी सातव्या विकेटसाठी २४८ चेंडूंत १०४ धावांची भागीदारी केली. त्यामुळे दिवसअखेर गोव्याला ८ बाद २०४ धावा करता आल्या. तिसराच रणजी करंडक सामना खेळणाऱ्या कसवणकर याने दुसरे रणजी करंडक अर्धशतक पूर्ण केले. दिवसातील पाच षटके बाकी असताना दर्शन बाद झाल्यामुळे गोव्याला धक्का बसला. पार्थ रेखडेच्या गोलंदाजीवर त्याला अक्षय वाडकर याने यष्टिचीत बाद केले. ३४ वर्षीय दर्शनने ८७ व्या रणजी करंडक सामन्यात २४ वे अर्धशतक नोंदविले.

स्नेहलचे चार डावांत तीन‘भोपळे’

गोव्याचा (Goa) अनुभवी फलंदाज स्नेहल कवठणकर याची बॅट बडोद्याविरुद्ध पहिल्या डावात अर्धशतक केल्यानंतर कमालीची रुसली आहे. हा तीस वर्षीय फलंदाज चार डावांत तीन वेळा शून्यावर बाद झाला आहे. पाच डावांत त्याने फक्त ५७ धावा केल्या असून गोव्यासाठी ही बाब खूपच चिंताजनक ठरली आहे.

संक्षिप्त धावफलक

गोवा, पहिला डाव ः ८६ षटकांत ८ बाद २०४ (सुयश प्रभुदेसाई १, शिवेंद्र भुजबळ ०, मंथन खुटकर १६, अभिनव तेजराणा ३०, स्नेहल कवठणकर ०, ललित यादव २२, यश कसवणकर नाबाद ५१, दर्शन मिसाळ ५१, ऋत्विक नाईक ६, वासुकी कौशिक नाबाद ४, हर्ष दुबे १८-३-४७-१, नचिकेत भुते १८-४-४०-४, यश ठाकूर १५-३-३५-०, रजनीश गुरबानी १७-७-२८-२, पार्थ रेखडे १५-३-३१-१, अमन मोखाडे ३-१-४-०).