Professional League 2024: पोलिस संघाचा दहा खेळाडूंसह ‘साळगावकर’ला धक्का; एफसी गोवाची चर्चिल ब्रदर्सवर मात

Goa Professional Football League 2024

पणजी: सामन्याच्या पूर्वार्धात खेळाडूस रेड कार्ड मिळाल्यानंतर सुमारे तासभर गोवा पोलिस संघाला दहा खेळाडूंसह खेळावे लागले, तरीही नाऊमेद न होता त्यांनी प्रोफेशनल लीग फुटबॉल स्पर्धेत क्लब द साळगावकरला २-० फरकाने धक्का दिला. म्हापसा येथील धुळेर स्टेडियमवर रविवारी सामना झाला.

क्लब द साळगावकरचा हा स्पर्धेतील पहिलाच पराभव ठरला. गोवा पोलिस संघाच्या साईश कुंकळकर याला ३१व्या मिनिटास रेड कार्ड मिळाले, त्यामुळे सामन्यातील बाकी ५९ मिनिटे त्यांना दहा खेळाडूंसह खेळावे लागले.

त्यापूर्वी १६व्या मिनिटास रोनाल्डो ऑलिव्हेरा याच्या गोलमुळे गोवा पोलिस संघाने आघाडी प्राप्त केली होती. नंतर ६५व्या मिनिटास बदली खेळाडू सॅम्युएल डिसोझा याने केलेल्या गोलमुळे गोवा पोलिसांचा स्पर्धेतील पाचवा विजय नक्की झाला. त्यांचे आता सहा लढतीतून सर्वाधिक १५ गुण झाले असून स्पर्धेत अग्रस्थान मिळविले आहे. पहिल्या पराभवानंतर क्लब द साळगावकरचे सहा सामन्यांनंतर ११ गुण कायम राहिले.

एफसी गोवाची चर्चिल ब्रदर्सवर मात

बाणावली येथे रविवारी झालेल्या प्रोफेशनल लीग फुटबॉल स्पर्धेतील सामन्यात एफसी गोवा संघाने चर्चिल ब्रदर्सला ४-३ फरकाने निसटते हरविले. एफसी गोवासाठी लाल्थांगलियाना याने पहिल्या, जोव्हियल डायस याने अनुक्रमे सहाव्या व १८व्या, तर ब्रायसन परेराने ३७व्या मिनिटास गोल केला. चर्चिल ब्रदर्सने चार गोलच्या पिछाडीवरून मुसंडी मारली. त्यांच्यासाठी अश्वेक जाधव याने ४४व्या, बदली खेळाडू लुनमिन्लेन हाओकिप याने ५१व्या, तर ट्रिजॉय डायसने ७८व्या मिनिटास प्रत्येकी एक गोल केला. स्पर्धेतील तिसऱ्या विजयामुळे एफसी गोवाचे आता सहा लढतीतून नऊ गुण झाले आहेत, तर चर्चिल ब्रदर्सचे सहा सामन्यांनंतर तीन गुण कायम राहिले.