Professional League: क्लब द साळगावकरचा चौथा विजय! वास्को स्पोर्टसवर एकतर्फी मात

Professional Football League 2024

पणजी: क्लब द साळगावकरने वास्को स्पोर्टस क्लबवर ४-१ अशी एकतर्फी मात करून गोवा प्रोफेशनल लीग फुटबॉल स्पर्धेत पूर्ण तीन गुणांची कमाई केली.सामन्याच्या उत्तरार्धात गोलधडाका राखलेल्या क्लब द साळगावकरने स्पर्धेतील चौथा विजय नोंदविला.

प्रतेश शिरोडकरने दोन गोल नोंदविताना अनुक्रमे ६३ व ६६व्या मिनिटास अचूक नेम साधला. नंतर ७२व्या मिनिटास म्युटन फर्नांडिसने आघाडी ३-० अशी मजबूत केली. हर्षद नाईक याने ७८व्या मिनिटास वास्को क्लबची पिछाडी एका गोलने कमी केली.

९०+४ व्या मिनिटास रॉजर परेराच्या गोलमुळे क्लब साळगावकरने वर्चस्व अधोरेखित झाले. क्लब द साळगावकरचे आता सात सामन्यांतून १४ गुण झाले आहेत. वास्को क्लबला पाचवा पराभव पत्करावा लागला, त्यामुळे सात लढतीनंतर त्यांचे चार गुण कायम राहिले.