Chess Tournament: 'मनोहर पर्रीकर’ स्पर्धेत अमेय, एथन, ऋत्विज यांची विजयी सलामी; 23 देशांतील बुद्धिबळपटू सहभागी

Manohar Parrikar’Goa International Open Grandmaster Chess Tournament

पणजी: गोव्याचे आंतरराष्ट्रीय मास्टर (आयएम) बुद्धिबळपटू अमेय अवदी, एथन वाझ, ऋत्विज परब यांनी ‘मनोहर पर्रीकर’ गोवा आंतरराष्ट्रीय खुल्या ग्रँडमास्टर बुद्धिबळ स्पर्धेच्या ‘अ’ गटात विजयी सलामी दिली. दहा फेऱ्यांच्या या स्पर्धेत शनिवारी ताळगाव पठारावरील डॉ. श्यामाप्रसाद मुखर्जी इनडोअर स्टेडियममध्ये सुरवात झाली.

अमेय (एलो २४२२) याने पहिल्या फेरीत काळ्या मोहऱ्यांसह खेळताना छत्तीसगडच्या अयान गर्ग याला नमविले. राष्ट्रकुल पदक विजेता एथन (एलो २४१२) याने दिल्लीच्या ईशान वाधवान याला पराभूत केले, तर ऋत्विजने (एलो २३७१) तेलंगणाच्या निर्वाण भिमिदी याला पराजित केले. गोव्याचा ग्रँडमास्टर अनुराग म्हामल याला पहिल्या फेरीत धक्का बसला.

त्याला अमेरिकन ग्रँडमास्टर रसेट झियात्झिनोव याने ४९ चालींत पराभूत केले. उद्‍घाटन सोहळ्यास क्रीडामंत्री गोविंद गावडे, गोवा बुद्धिबळ संघटनेचे अध्यक्ष महेश कांदोळकर, सचिव आशेष केणी, खजिनदार विश्वास पिळणकर, उपाध्यक्ष अरविंद म्हामल यांची उपस्थिती होती. स्पर्धेत भारतासह २३ देशांतील बुद्धिबळपटू सहभागी झाले आहेत.