Lionel Messi In India: ठरलं! भारतात येतोय फुटबॉलचा बादशहा 'मेस्सी'; केरळमध्ये खेळणार सामना

तिरुअनंतपुरम: फुटबॉल सुपरस्टार लिओनेल मेस्सी आणि त्याचा अर्जेंटिना संघ १० ते १८ नोव्हेंबर २०२५ या कालावधीत केरळला भेट देणार असल्याची अधिकृत घोषणा अर्जेंटिना फुटबॉल असोसिएशनने केली आहे. भारतीय फुटबॉल चाहत्यांसाठी मैलाचा दगड ठरणाऱ्या या कार्यक्रमात, विश्वविजेता अर्जेंटिना संघ येथील ग्रीनफिल्ड स्टेडियमवर एक प्रदर्शनीय सामना खेळणार आहे.

अर्जेंटिनाचा हा सामना केरळ सरकार आणि रिपोर्टर ब्रॉडकास्टिंग कंपनी प्रायव्हेट लिमिटेड यांच्या सहकार्याने आयोजित केला जात आहे. मेस्सी आणि त्याचा अर्जेंटिना संघ केरळमध्ये खेळणार, असे निश्चित होत होते;

परंतु हा दौरा रद्द झाल्याचे वृत्त प्रसरले होते. आता अशा अफवांवर आणि चुकीच्या बातम्यांवर या घोषणेमुळे पूर्णविराम लागला आहे. फिफाच्या आंतरराष्ट्रीय सामन्यांच्या वेळापत्रकातील अडचणीमुळे अर्जेंटिनाचा संघ केरळला येणार नाही, असे मे महिन्यात प्रसिद्ध होत होते.

यावर प्रतिक्रिया देताना रिपोर्टर टीव्हीचे व्यवस्थापकीय संचालक आणि संपादक अँटो ऑगस्टीन यांनी सांगितले, अर्जेंटिना फुटबॉल संघटनेकडून हा दौरा रद्द झाल्याची कोणतीही माहिती देण्यात आलेली नव्हती.

आमच्याकडून तयारी व्यवस्थित सुरू आहे. चुकीच्या बातम्या पसरवू नयेत. या अधिकृत वृत्तामुळे केरळच्या फुटबॉलप्रेमींमध्ये प्रचंड उत्साह निर्माण झाला आहे.

कतार विश्वचषकादरम्यान केरळच्या चाहत्यांनी दिलेल्या प्रचंड पाठिंब्याने प्रभावित होऊन अर्जेंटिनाच्या संघाने ही भेट ठरवली होती. २४ सप्टेंबर २०२४ रोजी केरळचे क्रीडामंत्री व्ही. अब्दुर्रहिमान यांनी फेसबुक पोस्टद्वारे ही माहिती दिली होती.

त्यांनी म्हटले होते, केरळच्या फुटबॉल चाहत्यांचे प्रेम आणि समर्थन अविस्मरणीय आहे. अर्जेंटिनाचा संघ त्यांच्याशी थेट संवाद साधण्यास उत्सुक आहे.

विश्वविजेत्या संघाचे यजमानपद भूषवण्यासाठी मोठा खर्च अपेक्षित होता, तरी केरळ सरकारने अर्जेंटिना फुटबॉल संघटनेला निमंत्रण दिले. त्यानंतर झालेल्या ऑनलाइन चर्चेत अर्जेंटिनाच्या संघाने केरळमधील फुटबॉल विकासासाठी सहकार्याची तयारी दर्शवली.

या भेटीमुळे केरळच्या क्रीडा क्षेत्रालाही मोठा चालना मिळेल. अर्जेंटिना फुटबॉल संघटनेच्या सहकार्यामुळे केरळमध्ये फुटबॉल विकास कार्यक्रम, प्रशिक्षण शिबिरे आणि प्रतिभावान खेळाडू शोधण्यासाठी उपक्रम राबवले जाऊ शकतात.