Goa Chess: अमेय अवदीची ‘आंतरराष्ट्रीय’ छाप; दोन बुद्धिबळ स्पर्धांत संयुक्त प्रथम स्थान

पणजी: भारतीय इंटरनॅशनल मास्टर (आयएम) बुद्धिबळपटू अमेय अवदी याने चेक प्रजासत्ताकात झालेल्या आंतरराष्ट्रीय बुद्धिबळ स्पर्धेत छाप पाडली. गोमंतकीय खेळाडूने चेक ओपन पार्दुबिचे - अ स्पर्धेत, तसेच साचोव्ही फेस्टिव्हल चेस्के बुदेयोविचे आयएम स्पर्धेत संयुक्त पहिला क्रमांक मिळविला.

पार्दुबिस ओपन स्पर्धेत अमेयला २४वे मानांकन होते. नऊ फेऱ्यांच्या स्पर्धेत त्याने अपराजित राहताना साडेसात गुणांची कमाई केली. यामध्ये सहा विजय व तीन बरोबरींचा समावेश होता.

प्रमुख खेळाडूंत अव्वल मानांकित रुमानियन ग्रँडमास्टर लिव्हियू निसिपेयानू, इस्त्राईलचा ग्रँडमास्टर एव्हजेनी झानान, चेकची वूमन इंटरनॅशनल मास्टर पेत्रा सोचोरोवा यांना बरोबरीत रोखले. अमेय व चेक प्रजासत्ताकाचा आयएम व्हाक्लाव फिनेक यांचे समान साडेसात गुण झाले. टायब्रेकर गुणांत व्हाक्लाव याला विजेतेपद, तर अमेयला उपविजेतेपद मिळाले. स्पर्धेत ३७ देशांतील १९९ खेळाडू सहभागी झाले होते, त्यात १०७ खेळाडू मानांकित होते.

त्यापूर्वी झालेल्या साचोव्ही फेस्टिव्हल स्पर्धेतही अमेयने अपराजित धडाका राखला. नऊ फेऱ्यांतून त्याने सहा गुणांची कमाई केली. या स्पर्धेत युक्रेनचा आयएम येव्हजेनी रोश्का याचेही सहा गुण झाले. टायब्रेकर गुणांत पुन्हा अमेय उपविजेता ठरला, तर येव्हजेनी विजेता ठरला.