I League: चर्चिल ब्रदर्स संधीचा फायदा घेणार का? शेवट स्थानी असलेल्या दिल्लीसोबत होणार सामना

I League Churchill Brothers Vs Delhi Fc

पणजी: आय-लीग फुटबॉल स्पर्धेत एकदम शेवटच्या बाराव्या स्थानी असलेल्या दिल्ली एफसीविरुद्ध मंगळवारी (ता. ११) चर्चिल ब्रदर्सला गुणतक्त्यातील आघाडी वाढविण्याची संधी असेल. सामना राय पंचायत मैदानावर खेळला जाईल.

अव्वल स्थानावरील चर्चिल ब्रदर्स व दुसऱ्या क्रमांकावरील नामधारी एफसी यांच्यात सध्या दोन गुणांचा फरक आहे. चर्चिल ब्रदर्सच्या खाती २६, तर नामधारी एफसीचे २४ गुण आहेत.

चर्चिल ब्रदर्सने राय पंचायत मैदानावर मागील लढतीत गोकुळम केरळाचे कडवे आव्हान परतावून लावताना २-१ फरकाने विजय मिळविला होता, याच मैदानावर त्यापूर्वीच्या लढतीत त्यांना स्पोर्टिंग क्लब बंगळूरने बरोबरीत रोखले होते.

१३ सामन्यांत माजी विजेत्यांनी आठ विजय, दोन बरोबरी व तीन पराभव अशी कामगिरी केली आहे. दिल्ली एफसीच्या खाती फक्त नऊ गुण आहेत. १३ पैकी आठ लढतीत त्यांना पराभव पत्करावा लागला असून दोन विजय व तीन बरोबरी आहेत.