Goa Olympic Association: ऑलिंपिक असोसिएशनने शब्द पाळला; खेळाडू आनंदी

पणजी: गतवर्षी ऑक्टोबर-नोव्हेंबरमध्ये राज्यात झालेल्या ३७व्या राष्ट्रीय क्रीडा स्पर्धेतील पदकविजेत्यांना बक्षिसांतर्गत रोख रक्कम देण्याचा शब्द शनिवारी गोवा ऑलिंपिक असोसिएशनने (जीओए) पाळला, त्यामुळे गोमंतकीय क्रीडापटूंच्या चेहऱ्यावर हास्य फुलले.

‘जीओए’च्या वार्षिक आमसभेनंतर बक्षीस वितरण झाले. संघटनेचे अध्यक्ष केंद्रीयमंत्री श्रीपाद नाईक, सचिव गुरुदत्त भक्ता, खजिनदार जयेश नाईक, उपाध्यक्ष राजू मंगेशकर यांची उपस्थिती होती. संघटनेचे दिवंगत खजिनदार परेश कामत यांना श्रद्धांजली वाहण्यात आली.

गोव्याने विक्रमी कामगिरी बजावताना २७ सुवर्ण, २७ रौप्य व ३८ ब्राँझ मिळून एकूण ९२ पदके जिंकली होती. नंतर डोपिंगमध्ये ब्राँझपदक जिंकलेला ॲथलीट (धावपटू) दोषी आढळला होता. त्यामुळे त्याला पदक गमवावे लागले. ॲथलेटिक्स वगळता एकूण १५ क्रीडा संघटनांच्या खेळाडूंनी पदके जिंकली.

जीओए मान्यताप्राप्त क्रीडा संघटनांच्या केवळ गोमंतकीय क्रीडापटूंना रोख रक्कम देण्यात आली. अनुक्रमे सुवर्ण, रौप्य आणि ब्राँझपदक विजेते खेळाडू, तसेच संघांना मिळून गोवा ऑलिंपिक असोसिएशनतर्फे एकत्रित १२ लाख २५ हजार रुपये बक्षीस रक्कम वितरीत करण्यात आली. सुवर्णपदकासाठी एक लाख रुपये, रौप्यपदकासाठी ५० हजार रुपये, तर ब्राँझपदकासाठी २५ हजार रुपये बक्षीस रक्कम आहे.