Lara Sharma: FC Goa चा गोलरक्षक 'लारा' पुनरागमनासाठी सज्ज! संयमाने केली दुखापतीवर मात

पणजी: एफसी गोवाचा गोलरक्षक लारा शर्मा याच्यासाठी वर्षभराचा कालावधी खूपच खडतर ठरला. कारकिर्दीत प्रथमच झालेली गंभीर स्वरुपाची दुखापत, त्यानंतर तंदुरुस्ती गाठताना पुनर्वसन प्रक्रियेतील काळ आव्हानात्मक होता. प्रतिकुल परिस्थितीत संयम महत्त्वाचा ठरला, असे मत या २६ वर्षीय फुटबॉलपटूने शुक्रवारी व्यक्त केले.

अमृतसर-पंजाब येथील २५ वर्षीय गोलरक्षक लारा म्हणाला, की ‘‘मला घाई नाही. मी पुनरागमनासाठी सज्ज आहे. ते कधीही होऊ शकते, ते उद्या असेल किंवा महिनाभराने, मात्र मानसिकदृष्ट्या कणखर आहे. गेल्या वर्षी एप्रिलमध्ये मला दुखापत झाली. फुटबॉल कारकिर्दीत मला प्रथमच अशा वाईट परिस्थितीतून जावे लागले.

सुरवातीचे तीन-चार महिने कठीण ठरले, या कालावधीत संयम महत्त्वाचा ठरला. तंदुरुस्त होऊन पुन्हा मैदानात उतरणे सोपे नव्हते. एफसी गोवाच्या सीनियर खेळाडूंकडून मिळालेली प्रेरणा फायदेशीर ठरली. प्रशिक्षक मानोलो यांचे प्रोत्साहन मौल्यवान ठरले. आता पुन्हा खेळण्यास उत्सुक आहे.’’

टाटा अकादमी ते एफसी गोवा

गोलरक्षक लारा शर्मा याच्या फुटबॉल गुणवत्तेला जमशेदपूरस्थित टाटा फुटबॉल अकादमीत शास्त्रोक्त मार्गदर्शन लाभले. इंडियन ॲरोजकडून आय-लीग स्पर्धेत व्यावसायिक पदार्पण केल्यानंतर त्याची भारताच्या १९ वर्षांखालील संघात निवड झाली. आयएसएल स्पर्धेत बंगळूर एफसीतर्फे पाच सामने खेळल्यानंतर तो २०२३-२४ मोसमात केरळा ब्लास्टर्स संघात रुजू झाला. या संघातर्फे खेळताना गेल्या वर्षी एप्रिलमध्ये त्याला दुखापत झाली आणि तो मैदानाबाहेर गेला. २०२४-२५ मोसमासाठी गेल्या वर्षी जूनमध्ये लारा याला एफसी गोवाने करारबद्ध केले, मात्र तंदुरुस्तीच्या प्रक्रियेत असल्याने तो यंदा एकही सामना खेळू शकला नाही. ‘‘एकंदरीत फुटबॉलमधील माझी आतापर्यंतची वाटचाल आनंददायी असून अजून खूप मजल गाठायची आहे,’’ असे तो म्हणाला.

लारा शर्मा

‘‘पुनरागमनाच्या प्रक्रियेत असताना, तसेच प्रारंभीच्या सरावात दुखापत पुन्हा डोके वर काढेल हे भय मनात होते. त्यामुळे काही प्रमाणात साशंक होतो. संदेशभाईशी (झिंगन) पुष्कळ चर्चा केली. त्याने धीर दिला. आता मी खंबीर आहे.’’